Fær ekki Orkuveitugögn afhent

Þorbjörg Helga Vigfúsdóttir borgarfulltrúi Sjálfstæðisflokksins og varamaður í stjórn Orkuveitunnar fær ekki afhendar fundargerðir stjórnar Orkuveitunnar frá stofnun hennar árið 2000 til ársins 2008. Hún segir ótækt með öllu að leynd skuli ríkja yfir þessum gögnum, sérstaklega í ljósi þess að gera eigi allsherjar úttekt á rekstrinum.

Slæm skuldastaða Orkuveitu Reykjavíkur hefur verið mikið til umfjöllunar að undanförnu og nýlega var samþykkt í borgarráði að setja alls tólf milljarða króna í Orkuveituna til að bjarga rekstrinum. Þorbjörg Helga Vigfúsdóttir borgarfulltrúi er varamaður í stjórn Orkuveitunnar og hefur kallað eftir öllum fundargerðum stjórnarinnar allt frá árinu 2000 til 2008.

„Ég fékk fyrirspurnir frá fólki úti í bæ um ákveðið mál sem á rætur sínar að rekja aftur í tímann í Orkuveitunni.  Ég ætlaði að grennslast fyrir um þetta mál en minni beiðni um þessar upplýsingar var hafnað," segir Þorbjörg Helga.

Hún segist ekki hafa fengið skýringar á því hvers vegna hún fær ekki aðgang að þessum upplýsingum. Nú hefur hins vegar verið ákveðið að gera allsherjar úttekt á rekstri orkuveitunnar frá stofnun hennar.

„Þess vegna kemur kannski meira á óvart að þetta skuli vera lokað og læst," segir Þorbjörg.

Eiríkur Hjálmarsson upplýsingafulltrúi Orkuveitunnar segir í samtali við fréttastofu að í starfsreglum orkuveitunnar frá 2003 hafi verið ákveðið að trúnaður ríkti yfir öllum fundargerðum frá stofnun félagsins. Þar geti meðal annars verið viðkvæmar upplýsingar um viðskiptavini og önnur viðskipti félagsins á raforkumarkaði.

Stjórn Orkuveitunnar geti eingöngu aflétt trúnaði yfir fundargerðum.  Trúnaði hafi hins vegar verið aflétt frá 2008 og til dagsins í dag. Allar fundargerðir fyrir þann tíma séu trúnaðarmál og eingöngu stjórnarmaður í orkuveitunni geti fengið aðgang að þeim. Varamenn í stjórn félagsins, borgarfulltrúar eða almenningur hafa því ekki aðgang að þessum upplýsingum.

Kjartan Magnússon borgarfulltrúi Sjálfstæðisflokksins og stjórnarmaður í Orkuveitunni segir fráleitt að varamenn fái ekki aðgang að sömu gögnum og aðalmenn. Mikilvægt sé að þeir fái sömu upplýsingar til að geta sinnt sínu starfi. Kjartan hyggst leggja fram tillögu um að leynd verði aflétt af fundargerðum allt frá árinu 2000 á næsta stjórnarfundi.