Sjálfstæðiskonur ánægðar með nýjan meirihluta í borginni

Landssamband Sjálfstæðiskvenna hefur ályktað um nýjan meirihluta í Reykjavík. Þær fagna því að sjálfstæðismenn fari aftur með völd í Reykjavík. „Allt tal um að stjórnarskiptin séu ólýðræðisleg á ekki við rök að styðjast. Nýr meirihluti er löglega kjörinn meirihluti í borginni," segir í ályktuninni.

„Með málefnasamninginn og stefnumál sjálfstæðismanna að leiðarljósi mun vegferð hins nýja meirihluta verða farsæl. Landssambandið fagnar sérstaklega þeim áherslum í málefnasamningnum sem snúa að börnum og öldruðum."

Þá hvetur landssambandið nýjan meirihluta til að koma sér hratt og örugglega að verki við að vinna stefnumálum sjálfstæðismanna í borginni framgang.

„Eftir borgarstjórnarfund á fimmtudag er ljóst að hlutfall karla og kvenna sem aðalmenn í fagráðum borgarinnar er jafnt. Þá fara sjálfstæðiskonur með formennsku í sex fagráðum borgarinnar af níu. Þessu ber sérstaklega að fagna," segir einnig og að lokum óskar landssambandið borgarfulltrúunum velfarnaðar í starfi.