Liverpool búið tapa fleiri leikjum en þrennulið Manchester United frá 1998-99

Liverpool liðið á þessu tímabili hefur verið borið mikið saman við þrennulið Manchester United frá 1998-99 en með tapinu á móti Chelsea í gær missti Liverpool af tveimur möguleikum á að jafna árangur þessa United liðs.

Liverpool datt út úr ensku bikarkeppninni í gær og á því ekki lengur möguleika á að vinna þrennuna á þessu tímabili. Liverpool er svo gott sem orðið enskur meistari og getur líka ennþá unnið Meistaradeildina. Manchester United vann ensku deildina, ensku bikarkeppnina og Meistaradeildina vorið 1999.

En Liverpool datt líka aftur úr Manchester United liðinu með því að tapa sínum sjötta leik á tímabilinu á Stamford Bridge í gær. Manchester United vann kannski færri deildarleiki en Liverpool þetta tímabil fyrir 21 ári síðan en þegar kemur að tapleikjum þá voru þeir aðeins fimm samtals hjá United á allri leiktíðinni.

Fimmti og síðasti tapleikur Manchester United liðsins tímabilið 1998-99 kom í deildarleik á móti Middlesbrough fimm dögum fyrir jól en United menn töpuðu ekki leik eftir 19. desember. Manchester United tryggði sér síðan enska meistaratitilinn (16. maí), enska bikarmeistaratitilinn (22. maí) og Evrópumeistaratitilinn (26. maí) á tíu ótrúlegum dögum vorið 1999.

Liverpool var búið að tapa þremur leikjum 19. desember í fyrra þar af einum þeirra með krakkaliðið sitt á móti Aston Villa. Liverpool hefur nú tapað þremur leikjum á aðeins tveimur vikum og er því komið upp í sex tapleiki samanlagt.

Töp Liverpool liðsins 2019-20

4. ágúast á móti Manchester City í leiknum um Samfélagsskjöldinn (vítakeppni)

17. september á móti Napoli í Meistaradeildnni (0-2)

17. desember á móti Aston Villa í enska deildarbikarnum (0-5)

18. febrúar á móti Atlético Madrid í Meistaradeildinni (0-1)

29. febrúar á móti Watford í deildinni (0-3)

3. mars á móti Chelsea í enska bikarnum (0-2)

Töp Manchester United liðsins 1998-99

9. ágúst á móti Arsenal í leiknum um Góðgerðaskjöldinn (0-3)

20. september á móti Arsenal í deildinni (0-3)

21. nóvember á móti Sheffield Wednesday í deildinni (1-3)

2. desember á móti Tottenham í enska deildarbikarnum (1-3)

19. desember á móti Middlesbrough í deildinni (2-3)