Bandaríski hermaðurinn nafngreindur - myrti sextán manns

Bandaríski hermaðurinn sem myrti sextán Afgana síðastliðinn sunnudag hefur verið nafngreindur af fjölmiðlum vestanhafs. Hann heitir Robert Bales og var liðþjálfi í bandaríska hernum.

Það var BBC fréttastofan sem greindi frá nafni mannsins upphaflega og hefur það nú verið staðfest af hátt settum yfirmanni bandaríska hersins.

Bales, sem er 38 ára gamall, er nú á leið til Fort Leavenworth í Kansas.

Lögmaður hans sagði í gær að skjólstæðingur sinn hefði særst tvisvar þegar hann gegndi herþjónustu í Írak. Bales hefur margoft verið heiðraður fyrir störf sín í hernum.

Bales er giftur og á tvö börn. Hann hefur gegnt herþjónustu í tæp ellefu ár.

Lögmaðurinn greindi einnig frá því að góðvinur Bales hafði slasast alvarlega stuttu áður en skotárásin átti sér stað. Þetta hefur þó ekki fengist staðfest af bandaríska hernum.

Gríðarleg reiði er í Afganistan vegna atviksins. Hamid Karzai, forseti Afganistan, hefur fordæmt árásina og hefur fyrirskipað hermönnum Bandaríkjanna að halda sig til hlés á meðan rannsókn á málinu stendur yfir.

Karzai sagði í dag að dráp NATO á óbreyttum borgurum væru svívirðileg. Hann sagði einnig að yfirvöld í Bandaríkjunum hefðu ekki hjálpað til við rannsóknina.