Robbie nýr tengdasonur Íslands

Breski söngvarinn Robbie Williams er nýjasti tengdasonur Íslands, ef marka má danska Ekstra blaðið. Söngvarinn heimsfrægi hélt tónleika í Parken í Kaupmannahöfn á fimmtudaginn var og lýsti þar yfir aðdáun sinni á rauðhærðri stúlku sem hann hafði kynnst á bar í Kaupmannahöfn.

Samkvæmt Ekstra blaðinu er um að ræða Snædísi Guðnadóttur, 25 ára fjármálastjóra, sem búsett hefur verið í Danmörku um árabil.

Tónleikar Robbies í Kaupmannahöfn vöktu mikla athygli þarlendra fjölmiðla, enda sóttu tæplega fimmtíu þúsund manns þá. Það eru samt ekki síst þau orð sem Robbie lét falla um Snædísi á tónleikunum sem hafa vakið athygli: "Rauðhærða stúlkan sem ég hitti á barnum var virkilega sæt."

Samband Snædísar og Robbies hefur meira að segja ratað á forsíður sumra dagblaða þar í landi og þá er Snædís gjarnan nefnd Rauðhettan hans Robbies.

Snædís vill sem minnst tala um málið við danska fjölmiðla og gefur lítið út á þau fallegu orð sem Robbie lét falla um hana.

"Ég var ekki á tónleikunum, svo ég veit ekki hvað fór þar fram. En ég hef engan áhuga á að tala um það sem gerðist," hefur Ekstra blaðið eftir Snædísi.

Samkvæmt dönskum fjölmiðlum átti parið rómantískt kvöld á barnum á Skt. Petris hótelinu, sem Robbie dvaldi á, daginn fyrir tónleikana.

Snædís virðist þó ekki eina stúlkan sem Robbie hafði áhuga á í Kaupmannahöfn, því samkvæmt Ekstra blaðinu var útsendari á vegum Robbie fyrir utan Parken og bað danskar stúlkur um símanúmer þeirra fyrir söngvarann. Útsendaranum varð nokkuð ágengt en það er alls óvíst að Robbie hafi hringt í stúlkurnar þar sem hann hefur átt við smávægileg veikindi að stríða upp á síðkastið.