Leggur til umbætur á vegamótum eftir umferðarslys

Rannsóknarnefnd umferðarslysa hefur lagt til umbætur á vegamótum Akrafellsvegar og Innessvegar vegna banaslyss sem þar varð í sumar.

Þar ók ökumaður strætisvagns í veg fyrir þrjá bifhjólamenn með þeim afleiðingum að sá sem fremstur var lést. Rannsóknarnefndin hefur lokið rannsókn sinni á málinu og segir meginorsök slyssins þá að ökumaður strætisvagnsins hafi ekið í veg fyrir bifhjólamanninn, blindaður af sól. Þá telur nefndin að reynsluleysi ökumannsins hafi verið meðverkandi þáttur í slysinu.

Rannsóknarnefndin sendi Vegagerðinni bréf í mars í fyrra í kjölfar alvarlegs slyss sem varð á vegamótunum og benti meðal annars á að þau væru illa merkt, hæðarmismunur væri mikill við vegamótin og umhverfi þeirra hættulegt ef ökutæki færu út af.

Í kjölfar banaslyssins í sumar sendi svo Hvalfjarðarsveit Rannsóknarnefndinni bréf um úrbótatillögur en umferð um vegamótin hefur aukist undanfarin ár. Breytingar eru í vændum samkvæmt upplýsingum frá Vegagerðinni.

Þá telur rannsóknarnefnd umferðarslysa mikilvægt að ökumenn beiti sólskyggni þegar sól er lágt á lofti og sömuleiðis sé mikilvægt að hreinsa rúður ökutækja reglulega. Ljóst sé að óhreinindi á framrúðu strætisvagnsins séu meðverkandi þáttur í slysinu. Þá er í skýrslu Rannsóknanefndar ábending til ökukennara sem kenna á bifhjól að leggja mikla áherslu á þjálfun í að sveigja frá hættu.