Forstöðumanni verði vikið frá

Hjón sem reka meðferðarheimilið Torfastaði krefjast þess að félagsmálaráðherra víki forstöðumanni Barnaverndarstofu úr starfi vegna aðkomu hans að meintu kynferðisbrotamáli gagnvart stúlku sem var á heimilinu. Ríkissaksóknari hefur vísað frá kæru á hendur syni hjónanna sem var sakaður um brotin. Forstöðumaður Torfastaða, Drífa Kristjánsdóttir, hefur óskað formlega eftir því að ráðherra rannsaki embættisfærslur Braga Guðbrandssonar, forstöðumanns Barnaverndarstofu, vegna ásakana sem fram komu á son hennar í febrúar á þessu ári. Skömmu áður hafði þjónustusamningi Torfastaða við ríkið verið sagt upp og ástæðurnar sem fyrir því voru gefnar var óvild Braga í garð meðferðarheimilisins en fyrir lá að ríkisendurskoðun fengi það mál til skoðunar. Í febrúar lagði stúlka, sem var í vistun á Torfastöðum, fram sakir á son Drífu um kynferðisofbeldi sem ríkissaksóknari vísaði frá. Drífa heldur því fram að málsmeðferð Barnaverndarstofu hafi verið með allt öðrum hætti en áður hafi gerst í sambærilegum málum og að strax virðist hafa legið fyrir að sonur hennar yrði kærður til lögreglu. Bragi Guðbrandsson hafði yfirstjórn með málsmeðferð Barnaverndarstofu og segir Drífa hann hafa hringt, eða látið starfsfólk sitt hringja, í fjóra eða fimm skjólstæðinga heimilisins og beðið þá um að staðfesta framburð stúlkunnar þess efnis að um fleiri stúlkur en hana væri að ræða. Hún segir hann jafnframt ekki hafa látið þau hjónin vita um málið fyrr en forrannsókn Barnaverndarstofu var lokið. Vegna þeirra ávirðinga sem hjónin að Torfastöðum höfðu áður borið á forstöðumann Barnaverndarstofu telja þau að hann hefði átt að víkja úr embætti á meðan ásakanir á hendur syni þeirra væru rannsakaðar. Þau krefjast þess að Braga verði vikið úr starfi og sæti áminningu vegna framgöngu sinnar. Bragi Guðbrandsson, forstöðumaður Barnaverndarstofu, vildi ekki tjá sig um málið þegar eftir því var leitað í dag.