Viðeigandi að þinga í Höfða

Í dag lýkur tveggja daga stefnumótunarfundi bandarísk- evrópsku stofnunarinnar East-West Institute í Höfða í Reykjavík, en fundurinn hófst í gærmorgun. East-West Institute er sjálfstæð stofnun og var sett á laggirnar árið 1981. Hún hefur síðan beitt sér í helstu deilumálum heimsins á hverjum tíma og er ein stærsta stofnun sinnar tegundar. Fundurinn er haldinn hér á landi fyrir milligöngu Ólafs Ragnars Grímssonar, forseta Íslands. John E. Mroz er stofnandi og forseti stofnunarinnar. Hann segir að á fundinum munu fulltrúar Bandaríkjanna, Bretlands og Rússlands stilla saman strengi eftir nýafstaðin leiðtogakjör í Rússlandi, Bandaríkjunum og Evrópusambandinu og meta stöðu alþjóðamála í ljósi hryðjuverkaógnar. Þá verði einnig tekin fyrir umhverfismál, sambúð Rússlands við Evrópusambandið og aðstæður sem skapast hafa í Mið-Austurlöndum við fráfall Arafats, en Mroz hefur dvalið í Ramallah og Tel Aviv síðastliðna viku og rætt við ráðamenn þar. Mroz segir viðeigandi að fundurinn sé haldinn í Höfða. „Árið 1986 leituðu bandarísk stjórnvöld til okkar og báðu okkur um að kanna hvaða breytingar kynnu að fylgja Gorbatsjov sem var þá nýkominn til valda.Í fyrsta skipti skipuðum við sérstaka nefnd sem vann skýrslu um málið og var niðurstaðan sú að Gorbatsjov vildi koma á breytingum. Seinna um árið funduðu hann og Reagan hér í Höfða.“ Mroz segir að Vladimir Pútin Rússlandsforseti hafi einnig leitað til EWI þegar George Bush komst fyrst til valda. „ Stefna Bush gagnvart Rússlandi var óljós til að byrja með og rússnesk stjórnvöld leituðu til okkar og báðu okkur um að kanna hvernig Bandaríkin hygðust haga samskiptum sínum við þau.“ Í hádeginu í dag heldur Mroz, ásamt þremur öðrum forystumönnum EWI, erindi við Háskóla Íslands þar sem málefni Mið-Austurlanda verða rædd, en Mroz telur að betri aðstæður en oft áður hafi skapast til að koma á varanlegum friði milli Ísraels- og Palestínumanna.