Erlent

Ástrali fær háar bætur eftir að hafa setið sak­laus í fangelsi í ní­tján ár

Atli Ísleifsson skrifar
David Eastman var árið 1995 dæmdur í lífstíðarfangelsi fyrir að myrða lögreglumanninn Colin Winchester sex árum fyrr.
David Eastman var árið 1995 dæmdur í lífstíðarfangelsi fyrir að myrða lögreglumanninn Colin Winchester sex árum fyrr. epa

Ástrali sem sat saklaus í fangelsi í nítján ár fékk í morgun bætur frá fylkisstjórninni í höfuðborginni Canberra fyrir það sem hann þurfti að ganga í gegnum. 

David Eastman var árið 1995 dæmdur í lífstíðarfangelsi fyrir að myrða lögreglumanninn Colin Winchester sex árum fyrr. Honum var síðan sleppt á þeirri forsendu að réttarhöldin yfir honum hafi verið gölluð, og var síðan sýknaður af morðinu en þó ekki fyrr en hann hafði setið inni í nítján ár. Morðingi lögreglumannsins hefur aldrei fundist.

Eastman, sem nú er orðinn 74 ára gamall, fékk sjö milljónir ástralskra dala í bætur, sem gera rétt tæpar 600 milljónir íslenskra króna.

Hann hafði áður hafnað boði yfirvalda bætur upp á 3,8 milljón ástralskra dala, um 325 milljónir íslenskra. Sagðist hann hafa misst af tækifæri til að eignast fjölskyldu og átt starfsframa vegna afplánunar sinnar.

Rannsókn á morðinu á lögreglumanninum Winchester er ein sú umfangsmesta í sögu Ástralíu. Hann var skotinn í höfuðið í tvígang fyrir utan heimili sitt í höfuðborginni Canberra árið 1989. Eastman var á þessum tíma opinber starfsmaður og lá undir grun þar sem hann átti að hafa sent lögreglu hótanir vegna rannsóknar á sakamáli.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.