Innlent

„Ef þetta væri fyrsti stokkurinn í heiminum þá myndi mér ekki lítast á blikuna“

Kristín Ólafsdóttir skrifar
Dagur B. Eggertsson, borgarstjóri.
Dagur B. Eggertsson, borgarstjóri. Vísir/vilhelm

Dagur B Eggertsson, borgarsstjóri Reykjavíkur, segir það einn af „stóru sigrunum“ að samgönguframkvæmdir verði fjármagnaðar af innheimtum veggjöldum á höfuðborgarsvæðinu.Þá verði það flókið en „leysanlegt“ verkefni að halda umferð gangandi á höfuðborgarsvæðinu við umfangsmiklar framkvæmdir eins og þegar Miklabraut verður sett í stokk.

Samgöngusáttmálinn var kynntur í lok síðasta mánaðar en samkvæmt honum á að setja 120 milljarða í uppbyggingu á samgönguinnviðum og almenningssamgöngum á höfuðborgarsvæðinu til fimmtán ára. Gert er ráð fyrir uppbyggingu Borgarlínu í sáttmálanum, auk þess sem að leggja á 52,2 millarða í uppbyggingu stofnvega, auk annarra markmiða.

Sjá einnig: Segir Bjarna fjármagna kosningaloforð Dags B. Eggertssonar í Reykjavík

Dagur ræddi samgöngusáttmálann í þættinum Sprengisandi á Bylgjunni í morgun. Þar var hann inntur eftir því hvað það væri sem tryggði að sáttmálinn færi ekki út um þúfur þegar aðrir flokkar taka óhjákvæmilega við stjórnartaumunum fyrr eða síðar.

„Það er reynt að binda þannig um hnútana í samkomulaginu að það sé hald í því. Það eru auðvitað ákveðnir stjórnskipulegir fyrirvarar, Alþingi þarf að samþykkja allar fjárveitingar og framvegis en traustið byggir í raun á því að þarna er byggt á bestu upplýsingum,“ sagði Dagur.

Þá sagði hann sveitarfélögin á höfuðborgarsvæðinu hafa nálgast það með býsna opnum huga hverjar bestu lausnirnar væru. Það væri mikilvægt þegar kæmi að samgöngu- og skipulagsmálum.

„Sveitarfélögin á höfuðborgarsvæðinu eru alls ekki einlit pólitískt en þau hafa staðið saman að því að vinna þetta vel og komast að sameiginlegri niðurstöðu. Núna eru þau tíðindi orðin að við höfum náð saman við ríkisstjórn sem líka endurspeglar mjög breitt pólitískt litróf.“

Hluti af þeim framkvæmdum sem ráðist verður í. Stjórnarraðið

Í samgöngusáttmálanum er gert ráð fyrir að sérstök fjármögnun standi straum af 60 milljörðum króna, sem verður m.a. tryggð við endurskoðun gjalda af ökutækjum. Dagur sagði aðspurður að það kæmi skýrt fram í samkomulaginu að þetta fjármagn, sem innheimtast mun í gegnum t.d. veggjöld, renni í viðeigandi framkvæmdir.

„Mér finnst þetta einn af stóru sigrunum í þessu samkomulagi frá sjónarhóli okkar sem stýrum sveitarfélögunum á höfuðborgarsvæðinu. Ég held að óháð þessu samkomulagi þá stefnum við í breytta gjaldtöku á umferð,“ sagði Dagur.

„Það að hafa náð samkomulagi að umferðar- og flýtigjöld sem innheimt verða á höfuðborgarsvæðinu renni til fjárfestinga og framkvæmda innan höfuðborgarsvæðisins er mjög stórt mál.“

Eitt af helstu baráttumálum Dags í samgöngum hefur löngum verið að setja Miklubraut, og fleiri umferðaræðar, í svokallaðan stokk, þannig að umferð um Miklubraut fari í raun í jarðgöng og borgarlína gangi fyrir ofan.

En hvernig hafa borgaryfirvöld hugsað sér að halda umferð gangandi um til dæmis Miklubrautina þegar svo umfangsmiklar framkvæmdir standa yfir?

„Já, það verður handleggur. Og ef þetta væri fyrsti stokkurinn í heiminum þá myndi mér ekki lítast á blikuna,“ sagði Dagur.Framkvæmdum myndi til að mynda þurfa að áfangaskipta svo allt gangi upp.

„Það verður verkefni sem verður flókið, við vitum það, en ég er alveg sannfærður um að það sé leysanlegt.“

Viðtalið við Dag úr Sprengisandi má hlusta á í spilaranum hér að neðan.


Tengdar fréttir

Telur að samgöngusáttmálinn fari í þveröfuga átt við markmið hans

Sjónvarpsmaðurinn og borgarfræðingurinn Gísli Marteinn Baldursson hefur ýmislegt að athuga við samgöngusáttmálann sem ríkisstjórnin og sveitarfélögin á höfuðborgarsvæðinu undirrituðu í síðustu viku. Gísli Marteinn telur útilokað að yfirlýst markmið sáttmálans muni nást verði jafn mikið púður sett í uppbyggingu mannvirkja fyrir bílaumferð, líkt og ráð er gert fyrir.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.