Júlíspá Siggu Kling - Tvíburarnir: Þú ert með ástríðu til að skapa

Elsku Tvíburinn minn, þó að þú flækist oft í vandamál og vesen í kringum þig, þá þarftu bara að vita að þú þarft að sleppa, henda, gefa og hugga, en fyrst og fremst að taka þá afstöðu að vera með sjálfum þér í liði. Þú getur engan glatt ef þú ert ekki glaður sjálfur, svo farðu fyrst eftir sannfæringu þinni og frelsaðu aðra frá erfiðleikum eins mikið og þú getur, en ekki meira en þú getur.

Þetta er litríkt sumar fullt af bjartsýni því þú sættist við sjálfan þig og betrumbætir lífið þitt og verður í essinu þínu. Það mun allt ganga upp í sambandi við fjármál svo ekki vera að hugsa að einhvern tímann í framtíðinni þú munir þurfa þetta eða hitt, eða að eitthvað verði að vera svona eða hinsegin því þá nærðu ekki að blessa daginn sem þú hefur.

Þú framkvæmir margt sem þú varst búinn að láta bíða og fyllist áhuga á nýjum og spennandi málum, sem sagt ný áhugamál verða á vegi þínum og þó þú eigir í erfiðleikum með tengingar við fólk í kringum þig, þá verður ekkert mál fyrir þig að leysa það, gerðu bara þitt besta, það er nóg.

Ef þú ert laus og liðugur sem ég skil nú reyndar ekki samhengið á, þá mun ástin reyna að grípa þig á þessu sumri, taktu fagnandi á móti henni og hafðu gaman.

Lífstalan níu gefur þér þolinmæði og skilning ásamt því að gefa þér færni til að aðlagast ólíklegasta fólki og umhverfi, þú átt eftir að njóta þín út í ystu æsar og sama hvar þú ert þar verður sól.

Þú ert með ástríðu til að skapa og það er svo mikilvægt að þú gerir bara það sem þér sýnist, ekki skoða hvað aðrir eru að gera, né reyna að feta í annarra fótspor, þú átt eftir að geta stigið þín eigin sterku fótspor, svo skoðaðu hvað býr í þér og leyfðu ástríðunum brjótast fram því þú getur meira en þú hefur hugmynd um.

Ein uppáhalds vinkona mín er Tvíburi og þó hún eigi bara nokkur egg og einn kálhaus í ísskápnum getur hún töfrað fram veislumáltíð eins og ekkert sé, þetta er bara lítil saga, en þú átt eftir að segja og skrifa stóra sögu svo eftir þér verður tekið.

Knús og kveðja, þín Sigga Kling

Tvíburar 21. maí - 21. júní

Örn Árnason leikari, 19, júní 

Össur Skarphéðinsson húmoristi, 19. júní 

Páll Magnússon þingmaður , 17. júní 

Kjartan Atli Kjartansson fjölmiðlamaður, 23. maí 

Heimir Hallgrímsson knattspyrnuþjálfari, 10. júní 

Donald Trump, Bandaríkjaforseti, 14. júní 

Bjartmar Guðlaugsson, söngvari og snillingur, 13. júní 

Dagur B. Eggertsson, 19. júní 

Jóhann Kristófer Stefánsson, tónlistarmaður 12. júní 

Aníta Briem, leikkona, 29. maí 

Ingó Veðurguð, tónlistarmaður, 31. maí 

Joan Rivers, leikkona, 8. júní 

Marilyn Monroe, 1. júní 

Selma Björnsdóttir, 13. júní 

Sunna Rannveig Davíðsdóttir, bardagakona, 21. júní