Innlent

Ógeðslegt að mótmæla minnihlutahópum

Þórarinn Þórarinsson skrifar
"Engin manneskja er ólögleg.“ Boðskapur mótmælendanna í tjaldinu á Austurvelli er skýr og Sema Erla er í hópi þeirra sem taka undir þetta og mun standa við þessi orð á fundi á Austurvelli í dag.
"Engin manneskja er ólögleg.“ Boðskapur mótmælendanna í tjaldinu á Austurvelli er skýr og Sema Erla er í hópi þeirra sem taka undir þetta og mun standa við þessi orð á fundi á Austurvelli í dag. FBL/sigtryggur Ari
Íslenska þjóðfylkingin hefur boðað til „þögulla og friðsamra mótmæla“ milli klukkan 13-14 á Austurvelli í dag og hvetur fólk til þess að mæta með íslenska fánann og mótmæla „ofbeldi sem hælisleitendur sýndu samfélaginu og lögreglunni í vikunni,“ eins og það er orðað.

Á sama stað og tíma verður samstöðufundur með flóttafólki og þar verður mannréttindabaráttukonan Sema Erla Serdar framarlega í flokki.

Þessum tveimur hópum mótmælenda laust síðast saman á Austurvelli sumarið 2016 þegar Þjóðfylkingin mótmælti nýjum útlendingalögum.

„Þeir eru enn reiðir yfir því að vorum þarna á sínum tíma og svo boða þeir núna til mótmæla gegn mótmælunum sem hafa staðið yfir og standa enn,“ segir Sema Erla við Fréttablaðið.

Hún segir stöðuna því óneitanlega svipaða og 2016. „Þetta er samstöðufundur með flóttafólki og öðrum minnihlutahópum og beinist ekkert gegn Þjóðfylkingunni sérstaklega.“

Allir hafa sama rétt

„Þessi hópur talar mikið um að þau megi ekki koma sínum málflutningi á framfæri sem er náttúrlega bara þvæla,“ segir Sema um Þjóðfylkinguna. „Hér ríkir auðvitað tjáningarfrelsi og frelsi til að mótmæla og aðrir eiga þar sama rétt og þjóðernissinnar þannig að það er náttúrlega svolítil hræsni fólgin í því að kvarta undan slíkri þöggun en stunda hana svo á sama tíma.“

Félagar í Íslensku þjóðfylkingunni stóðu fyrir þögulum mótmælum á Austurvelli 2016 og endurtaka leikinn í dag. Þögnin var þó ekki alger þar sem mótmælum þeirra var mótmælt á sama tíma. FBL/stefán

Óþolandi ógeð

„Það sem er líka óþolandi í þessu er að það er ógeðslegt að boða til mótmæla gegn minnihlutahópum. Eitt er að mótmæla stefnu stjórnvalda eða stjórnmálaflokka en það er ólíðandi í okkar samfélagi að boða til mótmæla til höfuðs fólki sem er í sérstaklega viðkvæmri stöðu.“

Sema segir víða brotið á réttindum flóttafólks og að í raun séu þau aðeins að fara fram á að mannréttindi þeirra séu virt“ segir hún og hafnar alfarið þeirri hugmynd að með kröfum sínum sé flóttafólkið með frekju.

„Þetta er auðvitað fáránlegur málflutningur og vart svaraverður. Það er auðvitað engin frekja að tala fyrir almennum mannréttindum og gegn félagslegri einangrun og skertri heilbrigðisþjónustu. Þetta er bara ákall um að réttindi fólks á flótta séu virt á við réttindi annars fólks og þessar kröfur eru mjög hógværar og eðlilegar.“

 

Getum gert meira

„Þetta fólk er í gríðarlega viðkvæmri stöðu og hefur upplifað hluti sem ekkert okkar getur ímyndað sér og glímir við alls konar líkamlega og andlega kvilla,“ segir Sema.

„Móttökur okkar hafa áhrif á þessa einstaklinga og við getum og eigum bara að gera miklu betur fyrir þessa fáu sem koma hingað í leit að skjóli og vernd. Stjórnvöld skortir bara allan vilja til þess.

Við viljum að allir eigi sama rétt og búi við mannréttindi og mannúð. Þetta snýst bara um að mæta, sýna samstöðu og senda skýr skilaboð um að við sem samfélag samþykkjum ekki hatur, öfgar og fordóma. Það er tilgangurinn með þessu. Hatrið mun aldrei sigra. Öfgarnar munu aldrei fá að hafa yfirhöndina. Jörðin er okkar allra og við eigum öll sama rétt á að lifa á henni.“ thorarinn@frettabladid.is


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×