Mahrez bað Leicester um sölu

Riyad Mahrez hefur beðið Leicester formlega um sölu frá félaginu samkvæmt heimildum fjölmiðla í Englandi.

Sky Sports greinir frá því að Manchester City hafi boðið Leicester yfir 50 milljónir punda í leikmanninn og er það jafnframt talið vera annað tilboð City í Mahrez í janúarglugganum.

Mahrez æfði ekki með Leicester í morgun og var ekki á meðal leikmannanna sem ferðuðust til Liverpoolborgar fyrir leik liðsins gegn Everton annað kvöld.

Hann hefur áður beðið um sölu frá Leicester. Það gerði hann í maí í fyrra þegar ítalska félagið Roma var á eftir honum. Leicester vildi hins vegar ekki selja og hafnaði öllum tilboðum Roma í Mahrez.

Forráðamenn Leicester hafa samkvæmt heimildum Guardian sagt Manchester City að það muni þurfa „ótrúlega upphæð“ til þess að þeir íhugi að selja Mahrez.

Mahrez hefur verið hjá Leicester síðan 2013 og átti stóran þátt í Englandsmeistaratitli félagsins árið 2016. Hann hefur skorað 44 mörk í 165 leikjum fyrir Leicester.