Messan: Charlie Adam of hægur til að fá víti

Það var mikið um læti á bet365 vellinum í Stoke um helgina þegar heimamenn fengu nokkuð umdeilda vítaspyrnu og rifust um hver ætti að fá að taka spyrnuna.

Ríkharð Óskar Guðnason tók atvikið fyrir í Messunni í gær með sérfræðingum sínum Bjarna Guðjónssyni og Ríkharði Daðasyni.

„Við skulum vona að þeir fari að dæma á þetta víti, þá fáum við fullt fullt af vítum,“ sagði Bjarni þegar Rikki spurði hvort þetta ætti yfir höfuð að vera vítaspyrna.

Pele krækti í vítaspyrnuna og vildi fá að taka hana sjálfur. Hann er hins vegar ekki vítaskytta liðsins heldur er það Charlie Adam og hann fór á punktinn.

Adam tók spyrnuna, lét verja frá sér og var svo ekki nógu snöggur í frákastið og var boltinn tæklaður í burtu frá honum.

„Afhverju er hann svona lengi í frákastið,“ kallar Rikki, stórhneykslaður á Adam þarna.

Bjarni greip þá fram í og sagði að það væri klárt víti og rautt spjald á tæklinguna á Adam í frákastinu.

„Já ég veit það, en mér finnst bara að hann eigi ekki að fá það því hann er svo lengi. Hann á að vera löngu búinn að henda sér á boltann,“ sagði Rikki og var honum greinilega heitt í hamsi.

Þeir gátu þó sammælst á það að líklegast hefði dómarinn einfaldlega ekki þorað að dæma víti í seinna skiptið, nýbúinn að dæma frekar „soft“ vítaspyrnu.

Þessa stórskemmtilegu umræðu má sjá í spilaranum hér að ofan.