Vissi af kynferðisbrotadómi ökukennarans eftir allt saman

Björgvin Þór Guðnason, formaður Ökukennarafélags Íslands, þekkir vel til mannsins sem vinnur sem ökukennari og er dæmdur barnaníðingur. Einnig hafði hann vitneskju um dómana sem hann hafði hlotið.

Í Fréttablaðinu í gær var sagt frá því að dæmdur barnaníðingur starfaði sem ökukennari og sýslumaður í umdæmi hans hefði gefið út leyfi án þess að skoða dóma mannsins. Maðurinn var kærður og dæmdur fyrir kynferðisbrot gegn stjúpdætrum sínum sem stóðu yfir í langan tíma. Voru brot hans talin stórfelld og alvarlegs eðlis. Brotin áttu sér stað frá síðari hluta ársins 1982 allt fram í ársbyrjun 1987.

Í fréttinni sagðist Björgvin koma af fjöllum og ekki vita til þess að starfandi ökukennari hér á landi hefði verið dæmdur fyrir kynferðislega misnotkun á börnum. Það er hins vegar ekki rétt. Björgvin játar í samtali við blaðamann að hafa vitað af öllu saman og segist raunar þekkja umræddan ökukennara vel.

Sjá einnig: Níddist á börnum en starfar sem ökukennari

„Það er alveg rétt að ég þekki manninn ágætlega og af góðu einu. Hann er mikill fagmaður í starfi og ég veit ekki til þess að nokkurn skugga hafi borið á þau störf hans,“ segir formaðurinn.

Tvær konur sem Fréttablaðið ræddi við í gær segja aðra sögu og segja frá orðavali sem ekki hafi verið við hæfi. Á hann að hafa sagt við aðra konuna, sem þá var barn að aldri, að hann fengi vatn í munninn í hvert skipti sem hann sæi hana.

„Ástæða þess að ég kveikti ekki á þessu var að ég var með hugann við hvort eitthvert atvik hefði átt sér stað í bíl með ökukennara og kannaðist ekki við neitt slíkt athæfi. Þess vegna svaraði ég á þessa leið,“ útskýrir Björgvin.

Mikilvægt að fá annað tækifæri

Formaðurinn sagði í samtali við Fréttablaðið í gær að það væri mikilvægt fyrir ökukennarafélagið að „allt væri á hreinu“. Í ljósi stöðunnar hefði hann rætt við stjórn félagsins og Samgöngustofu með það að markmiði að fara yfir hlutina.

Sýslumaðurinn á Norðurlandi eystra gefur út leyfi fyrir ökukennara í umdæminu. Við skoðun embættisins var ekkert í gögnunum sem benti til þess að hann ætti ekki rétt á að vera ökukennari.

Björgvin segir mikilvægt að einstaklingar fái annað tækifæri. „Það eru mörg ár síðan þessi dómur féll og maðurinn hefur ekki gerst brotlegur síðan,“ segir hann.