Grafarvogsbúi í lífshættu eftir bruna í fjölbýlishúsi

Maður liggur í lífshættu á Landspítalanum eftir að eldur kviknaði í íbúð hans í sex hæða fjölbýlishúsi við Bláhamra í Grafarvogi í nótt. Eldsins varð vart um klukkan hálf þrjú og logaði mikill eldur í íbúðinni, þegar slökkvilið kom á vettvang.

Reykkafarar fundu húsráðandann meðvitundarlausan og var hann fluttur i skyndingu á sjúkrahús. Sex aðrir íbúar hússins voru fluttir á slysadeild til rannsókna vegna gruns um reykeitrun, en engan þeirra mun hafa sakað alvarlega. Þá var Rauði krossinn kallaður út og strætisvagn sendur á staðinn til að veita íbúunum skjól.

Tuttugu mínútum eftir að þetta útkall barst, var tilkynnt um alelda einbýlishús í Mosfellsbæ. Þar hafði fimm manna fjölskylda sloppið naumlega út í gegn um glugga á síðustu stundu og var fólkið flutt á slysadeild Landspítalans til aðhlynningar. Þar mun enginn þó hafa meiðst alvarlega og er talið að reykskynjari hafi bjargað því að ekki fór verr. Húsið er hinsvegar brunnið til grunna.

Eldsupptök eru ókunn á báðum stöðum. Loks lá við að illa færi þegar flugeldi var skotið inn um glugga á iðnaðarhúsnæði í Hafnarfirði. Þar kviknaði þó ekki eldur, en reykur og sót voru í húsnæðinu þegar slökkvilið kom á vettvang.