Neitaði að borga leigubílinn og veittist að lögreglumönnum

Leigubílstjóri óskaði eftir aðstoð lögreglu rétt fyrir klukkan þrjú í nótt því ölvuð kona neitaði að greiða fargjaldið. Konan brást illa við afskiptum lögreglu og sló og sparkaði til lögreglumanna. Konan var í framhaldinu vistuð í fangageymslu.

Samtals voru 112 mál bókuð í kerfi lögreglunnar á höfuðborgarsvæðinu í gærkvöldi og nótt. Nokkrar tilkynningar bárust um ofurölvi og ósjálfbjarga fólk í miðbænum og aðstoðaði lögreglan fólk við að komast í heimahús. Í einu tilviki reyndist það þó erfitt, en um var að ræða spænskan ferðamann sem gat engan veginn sagt hvar hann gisti. Lögreglan brá á það ráð að vista hann í fangageymslu þar til hann næði áttum.

Á níunda tímanum í gærkvöldi var óskað eftir aðstoð lögreglu vegna ónæðis og áreiti frá erlendum karlmanni. Þegar lögreglan hafði afskipti af manninum kom í ljós að hann hefur ekki landvistarleyfi og var hann því handtekinn og vistaður í fangageymslu. Mál hans verður tekið fyrir í dag.

Um hálf þrjú í nótt var óskað eftir aðstoð lögreglu vegna slagsmála við skemmtistað í miðbænum. Minniháttar áverkar voru á þeim sem í hlut áttu. Sá sem verst lét var handtekinn og vistaður í fangageymslu og við leit á lögreglustöð fundust á honum meint fíkniefni.

Tvítug stúlka óskaði eftir aðstoð lögreglu í Austurstræti laust fyrir klukkan þrjú í nótt en þá hafði önnur stúlka ráðist á hana og veitt henni áverka. Lögreglan telur sig vita hver gerandinn er.

Þá voru einnig þó nokkrir stöðvaðir af lögreglu vegna gruns um akstur undir áhrifum áfengis eða fíkniefna.