Innlent

Mun aldrei taka þátt í því að fá heimild til að blóðga viðskiptavini World Class

Birgir Olgeirsson skrifar
Björn Leifsson, eigandi World Class.
Björn Leifsson, eigandi World Class. FBL/GVA

Tólf líkamsræktarstöðvar og íþróttafélög sendu í dag frá sér sameiginlega yfirlýsingu þar sem hverskyns notkun stera og ólöglegra frammistöðubætandi efna við þjálfun var fordæmd. Lýstu félögin því jafnframt yfir að notkun slíkra efna yrði ekki liðin innan þeirra húsakynna né í keppnum á þeirra vegum.

Athygli vakti að tvær af stærstu líkamsræktarstöðvum landsins voru ekki á meðal þeirra sem sendu þessa yfirlýsingu, World Class og Sporthúsið.

Björn Leifsson, framkvæmdastjóri World Class, segir í samtali við Vísi að á heimasíðu World Class sé yfirlýsing þar sem öll notkun ólöglegra efna sé fordæmd og ekki liðin innan veggja World Class.

Ástæðan fyrir því að World Class var ekki á meðal þeirra líkamsræktarstöðva sem sendu þessa yfirlýsingu í dag er sú að sögn Björns að hann treysti sér ekki hafa samráð við aðrar stöðvar að neinu leyti vegna Samkeppniseftirlitsins.

„Ég er á nákvæmlega sömu skoðun og hinir,“ segir Björn í samtali við Vísi.

World Class mun taka þátt í forvarnarstarfi

Þessar stöðvar sem sendu yfirlýsinguna hyggja á samstarf við Lyfjaeftirlit Íslands um fræðslu og forvarnir vegna notkunar ólöglegra efna.

Björn sagði það sjálfgefið að World Class muni taka þátt í forvörnum sem varða þessi mál.

„En ég mun aldrei taka þátt í því að láta viðskiptavini skrifa undir skilmála þar sem ég hef heimild til að láta blóðga þig inn á stöð hjá mér. Það er gegn öllum persónuverndarlögum. En að sjálfsögðu tökum við þátt í forvarnarstarfi,“ segir Björn.

Frá World Class Laugum.

Þarna vísar hann til hugmynda sem ganga út á að Lyfjaeftirlitið muni hafa heimild til að framkvæma lyfjapróf á viðskiptavinum líkamsræktarstöðva. Hefur þetta fyrirkomulag tíðkast í nágrannalöndum okkar og þá gegn því að viðskiptavinirnir hafi skrifað undir samning þar sem kveðið er á um heimild til að lyfjaprófa þá.

Slíkt fyrirkomulag er þó ekki fyrir hendi á Íslandi en það hefur verið rætt af forráðamönnum Lyfjaeftirlitsins. Ekki stendur til að fara þá leið eins og sakir standa, heldur verður einblínt á forvarnir og fræðslu.

Draumur að fá að vera með

Þröstur Jón Sigurðsson, eigandi Sporthússins, segir í samtali við Vísi að það sé engin sérstök ástæða fyrir því að Sporthúsið var ekki með á umræddri yfirlýsingu. Sporthúsið hafi fullan hug að vera með í þessu samstarfi um forvarnir og fræðslu.

Hann segir að miðað við hversu margir ætla að taka þátt og að það stefni í að þetta verði fremur öflugt átak þá sé ekkert því til fyrirstöðu að Sporthúsið verði með.

Þröstur Jón Sigurðsson, eigandi Sporthússins. FBL/Anton Brink

„Þetta er eitthvað sem mér finnst algjör draumur að vera með og frábær framtíðarsýn,“ segir Þröstur og á ekki von á öðru en að Sporthúsið, Crossfit-stöðvar þess og Bootcamp verði með.

Yfirlýsing vegna notkunar á ólöglegum frammistöðubætandi efnum:
Það er ljóst að notkun stera og annarra ólöglegra frammistöðubætandi efna hefur aukist mikið síðustu ár. Það er því á okkar ábyrgð að viðurkenna vandann og bregðast við með ákveðnum aðgerðum.

Þeir notendur sem sjálfir grípa til slíkra örþrifaráða blekkja ekki aðeins sjálfa sig heldur einnig aðra þá er vilja stunda heilbrigðan lífsstíl. Notkun stera og annarra ólöglegra frammistöðubætandi efna ýtir undir brenglaða líkamsímynd og gefur ungu fólki röng skilaboð og óraunhæfar fyrirmyndir. Því viljum við sameinast um að draga skýr mörk og senda rétt skilaboð.

Eftirfarandi íþróttafélög og líkamsræktarstöðvar fordæma hverskyns notkun stera og ólöglegra frammistöðubætandi efna við þjálfun og lýsa því jafnframt yfir að notkun slíkra efna verður ekki liðin innan þeirra húsakynna né í keppnum á þeirra vegum.

Mjölnir
Hreyfing
CrossFit Akureyri
CrossFit Reykjavík
CrossFit XY
Sparta
Reebok Fitness
Metabolic
Héraðsþrek, Fljótsdalshéraði
CrossFit Austur
CrossFit Katla

CrossFit Hengill

Uppfært klukkan 21:58
Tveimur Crossfit-stöðvum var bætt við yfirlýsinguna nú í kvöld, CrossFit Kötlu og CrossFit Hengli. 

 


Tengdar fréttir

Steraæði á Íslandi

Læknar ávísa mun meira af sterum en áður, saksóknari sér tengingu við heimilisofbeldismál og eftirlit í líkamsræktarstöðvum er handan við hornið. Sérfræðingur segir stera ekki einkamál þeirra sem þá nota.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.