Innlent

Aukin sálfræðiaðstoð mikil framför fyrir slökkviliðs- og sjúkraflutningamenn

Kristín Ýr Gunnarsdóttir skrifar
Bjóða á slökkviliðs- og sjúkraflutningamönnum upp á sálfræðiaðstoð á vettvangi í erfiðum og stórum útköllum. Þeir segja þetta mikla framför og sérstaklega fyrir þá starfsmenn sem vinna úti á landi sem ekki hafa haft greiðan aðgang að slíkri þjónustu áður.

Í dag var undirritað nýtt samkomulag á milli Sambands íslenskra sveitarfélaga og Landssambands slökkviliðs- og sjúkraflutningamanna um aukinn sálfræðistuðning á landsvísu. Áhersla er lögð á fjóra mismunandi þætti og tengjast þeir allir því þegar slökkviliðs- eða sjúkraflutningamenn koma að erfiðum vettvangi þá eigi þeir greiða leið að sálfræðiþjónustu.

Slökkviliðs- og sjúkraflutningamenn segja samninginn stórt framfaraskref, sérstaklega fyrir þá sem vinna á landsbyggðinni og sinna eingöngu hlutastarfi. Sá hópur hefur ekki haft greiðan aðgang að sálfræðiþjónustu áður.

„Við erum að sjá eitt og annað í þessu starfi sem almenningur sér ekki. Sem reynir á okkur. Við erum öll með mismunandi þröskuld fyrir álaginu,“ segir Guðjón S. Guðjónsson, slökkviliðs- og sjúkraflutningamaður.

Hermann Sigurðsson, framkvæmdastjóri Landssambands slökkviliðs- og sjúklraflutningamanna.Vísir/Egill Aðalsteinsson

Álagið oft ekki augljóst

Hermann Sigurðsson, framkvæmdastjóri Landssambands slökkviliðs- og sjúkraflutningamanna, segir samninginn byltingu því mikilvægt sé að andleg heilsa sé góð og bregðast þurfi skjótt við álagi sem fylgir ef vettvangur sé erfiður.

„Kannski er mesta nýjungin sú að þegar það verða áföll þá er hægt að kalla sálfræðing á vettvang,” bendir Hermann á.

Sigríður Björk Þormar, doktor í áfallasálfræði, mun sinna þjónustunni og segir samninginn viðurkenningu á að stéttin þurfi á þessu að halda því álag hafi augljóslega aukist.

„Þannig að þeir geta allir í kjölfar ákveðinna atburða í samstarfi við sinn slökkviliðsstjóra fengið úrvinnslu. Það er oft erfitt að átta sig á nákvæmlega á því hvaða þættir það eru sem geta verið erfiðir fyrir ólíka einstaklinga. Það er ekkert alltaf sýnilegt slökkviliðsstjóra eða öðrum afhverju ákveðinn slökkviliðs- eða sjúkraflutningamaður þarf að leita sér aðstoðar,” segir hún.




Fleiri fréttir

Sjá meira


×