Tveir leikmenn fluttir á sjúkrahús í Reykjavík eftir þung höfuðhögg á Snæfellsnesi

Kalla þurfti til sjúkrabíls og þyrlu Landhelgisgæslunnar vegna knattspyrnuleiks sameinaðs liðs Reynis/Víðis gegn Snæfellsnesi í þriðja flokki pilta á Hellissandi fyrr í dag. Fengu tveir leikmenn þung höfuðhögg og þurfti að flytja annan með þyrlu á Landspítalann í Fossvogi.

Fyrst var greint frá þessu á vef Morgunblaðsins.

Fyrra atvikið átti sér stað þegar leikmaður Reynis/Víðis missti meðvitund eftir samstuð við leikmann Snæfellsnes. Leikmenn í þriðja flokki eru fæddir á árunum 2002 og 2003.

Freydís Bjarnadóttir, framkvæmdastjóri knattspyrnudeildar Snæfellsnes, segir í samtali við Vísi að sá leikmaður hefði náð meðvitund nokkuð örugglega aftur en fann fyrir svima og ógleði. Var ekið með hann á Landspítalann í Fossvogi í Reykjavík.

Freydís segir að sjúkrabíllinn hafi nánast ekki verið búinn að yfirgefa póstnúmer Hellissands þegar annar leikmaður missti meðvitund.

Um var að ræða leikmann Snæfellsnes sem hafði tekið mikinn sprett til að varna því að boltinn færi út fyrir hliðarlínu. Umhverfis völlinn er hraun og náði leikmaðurinn ekki að nema staðar og hafnaði út í hrauni. Þar missti hann jafnvægið og skall með höfuðið í grjóti.

Freydís segir það óhapp hafa litið nokkuð illa út. Ekki sást blóð á drengnum en ekki tókst að ná honum almennilega til meðvitundar og var því ákveðið að kalla út þyrlu Landhelgisgæslunnar en Freydís segir drenginn ekki einu sinni muna eftir þyrluferðinni.

Líkt og fyrr segir voru báðir leikmennirnir lagðir inn á Landspítalann í Fossvogi en hafa báðir verið útskrifaðir þaðan. Drengirnir meiddust sem betur fer ekki alvarlega en hefur verið ráðlagt af læknum að taka því rólega næstu daga.