„Ég á ekki að skammast mín“

Bandaríska söngkonan Miley Cyrus vakti nokkra athygli í vikunni fyrir að afturkalla afsökunarbeiðni sem hún gaf út árið árið 2008 vegna umdeildrar ljósmyndar. Cyrus útskýrði afstöðu sína enn frekar í spjallþættinum Jimmy Kimmel Live á þriðjudagskvöld og ítrekaði að hún ætti ekki að þurfa að skammast sín fyrir myndina.

Ljósmyndin umtalaða, sem tekin var af hinum heimsfræga ljósmyndara Annie Leibovitz, birtist í tímaritinu Vanity Fair árið 2008. Myndin var gríðarlega umdeild á sínum tíma en á henni sést Cyrus, sem þá var 15 ára, með bert bak og þótti mörgum umgjörðin allt of kynferðisleg.

Í kjölfarið gaf Cyrus út afsökunarbeiðni þar sem hún sagðist skammast sín fyrir þátttöku sína í myndatökunni, sem hefði átt að vera „listræn.“

Nú hefur Cyrus hins vegar dregið afsökunarbeiðnina til baka en hún birti tíst þess efnis á Twitter-reikningi sínum í vikunni.

IM NOT SORRY

Fuck YOU #10yearsagopic.twitter.com/YTJmPHKwLX

— Miley Ray Cyrus (@MileyCyrus) April 29, 2018

Hún skýrði nánar frá þessu í viðtali við spjallþáttastjórnandann Jimmy Kimmel í gærkvöldi.

„Einhverjum fannst að mér hefði orðið á í messunni en mér finnst óréttlátt að fólk bregðist þannig við og segi þetta mína skömm, og að ég eigi að skammast mín,“ sagði Cyrus.

Þá bætti Cyrus við að á sínum tíma hafi hún viljað stöðva umfjöllun um málið og að hún hafi einnig verið að átta sig á því hvað fælist í því að vera fyrirmynd. Árið 2008, þegar myndin var tekin, var Cyrus á hátindi ferils síns sem stjarna barna- og unglingaþáttanna Hannah Montana.

Cyrus þvertók einnig fyrir að kynferðislegt yfirbragð hefði verið á myndatökunni.

„Það var ekkert kynferðislegt við þetta á tökustað og það var eitrað hugarfar annarra sem breytti þessu í eitthvað sem það átti aldrei að vera. Þannig að í raun á ég ekki að skammast mín, heldur þau,“ sagði Cyrus en viðtalið má sjá í heild hér að neðan.