Stóraukið fjármagn í þróunarmál skóla og frístundar í Reykjavík

Borgarráð Reykjavíkur hefur samþykkt að bæta 60 milljónum króna við þróunarverkefni skólamála í haust. Alls er fjármagnið 100 milljónir og samþykkt var að verja 200 milljónum í skólaþróun á næsta ári. Þróunarmálin eru hluti af innleiðingu nýrrar menntastefnu Reykjavíkurborgar sem nær til grunnskóla, leikskóla, frístundar og félagsmiðstöðva. Um er að ræða töluverða aukningu þar sem þróunarsjóður var 19 milljónir í fyrra. 

„Nú er menntastefnan að fara í umsagnarferli hjá öllum starfstöðvum,“ segir Helgi Grímsson, sviðsstjóri, skóla- og frístundasviðs Reykjavíkur. „Hún mun birtast í endanlegri mynd í haust. fjármagnið er hugsað til að styrkja áherslur hvers og eins skóla og leikskóla, frístundar og félagsmiðstöðvar í átt að menntastefnunni þannig að hver og ein starfsstöð hefur mikið um það að segja hvernig hún vill vaxa fram. Þau munu ábyggilega gera það út frá einhversskonar stöðumati. Hverjir eru styrkleikar og veikleikar gagnvart menntastefnunni og beina þá fjármagni á þau verkefni sem gera hvern og einn skóla betri og hæfari til að starfa í anda stefnunnar.“

Margar leiðir eru færar fyrir starfsstöðvarnar til að bæta stöðu sína og mismunandi eftir starfsstöð. „Þetta gæti til dæmis verið að bæta ennfrekar lestrarkennslu,“ segir Helgi. „það gæti verið að auka fjölbreytni í skapandi verkefnum, koma með ný atriði inn í list- og verkefnakennslu, það getur verið eitthvað sem varðar heilsueflingu og til dæmis samstarfsverkefni á milli grunnskóla og frístundaheimilis til að efla félagshæfni yngstu barnanna.“