Sane frá í nokkrar vikur

Leroy Sane gæti verið fjarverandi vegna meiðsla í allt að fjórar vikur, en hann meiddist í sigri Manchester City á Cardiff í ensku bikarkeppninni í dag.

City vann leikinn 2-0 en var án krafta Sane í seinni hálfleik. Hann meiddist eftir tæklingu Joe Bennett undir lok fyrri hálfleiks.

„Hann verður úr leik í einhvern tíma, að minnsta kosti tvær, þrjár vikur, kannski í mánuð. Við vitum það betur á morgun,“ sagði Pep Guardiola.

Bennett fékk gult spjald fyrir brot sitt, en margir hefðu viljað sjá annan lit á spjaldinu. Guardiola vill að dómarar passi betur upp á leikmennina

„Ég hef sagt það oft áður, dómararnir eiga að vernda leikmennina, alla leikmenn.“