Tugir slösuðust í hruni í kauphöllinni í Jakarta

Göngubrú yfir anddyri kauphallarinnar í Jakarta, höfuðborgar Indónesíu, hrundi í morgun með þeim afleiðingum að í það minnsta fimmtán slösuðust. Kauphöllin var rýmd í kjölfarið og rannsakar lögregla nú orsakirnar.

Breska ríkisútvarpið BBC segir að fjöldi fólks hafi verið borinn út úr kauphöllinni á sjúkrabörum. Það hefur eftir starfsmanni Alþjóðabankans sem er í sömu byggingu að það hafi verið göngubrú á milli hæða yfir anddyrinu sem hrundi.

Argo Yuwono, talsmaður lögreglunnar, segir að þeir slösuðu séu meðal annars meiddir á höndum og fótum.

Uppfært 10:00 BBC segir nú að 72 hafi slasast þegar brúin hrundi yfir anddyrið. Lögreglan segir að ekki hafi verið um hryðjuverkaárás að ræða en að hún sé að rannsaka orsakirnar.