„Helsta skýringin sem liggur fyrir er að það hafi verið meiri járnabinding í mannvirkinu en þeir gerðu ráð fyrir,“ segir Sævar Freyr Þráinsson, bæjarstjóri Akraness, um misheppnað niðurrif verktakans Work North ehf. á fjórum sílóum á lóð Sementsverksmiðjunnar á laugardag.

Reynt var að fella sílóin með sprengiefni en ekki vildi betur til en svo að þau rétt bifuðust og tóra enn skökk á sínum stað svo hætta þykir stafa af.

Engar tilkynningar voru sendar til íbúa á Akranesi né heldur var bæjaryfirvöldum kunnugt um að verktakinn hygðist fara í verkið á laugardaginn. Sævar Freyr segir að síðustu samskipti við verktakann hafi verið á þá leið að búið væri að fresta sprengingunni yfir áramót.

Sævar segir verktakann hafa látið lögreglu vita og íbúa í allra næsta nágrenni en að bæjaryfirvöld hafi viljað upplýsa bæjarbúa um hvenær sprengingin yrði. Enginn eftirlits­aðili frá bænum var á svæðinu þegar sprengt var.

„Ekki þegar verkið sjálft fór fram. Það var haft samband við eftirlitsaðilann í aðdragandanum en þessu atriði varðandi hvenær framkvæmdin yrði var ekki sinnt að okkar kröfum.“

Sævar Freyr segir að misskilningur sé ekki orð sem hann myndi nota yfir það að verktakinn hafi farið í verkið án þess að upplýsa stjórnendur hjá bænum.

„Þeir sinntu ekki því að gera okkur kleift að sinna upplýsingagjöfinni til allra. Ein rökin sem nefnd voru fyrir því var að þeir vildu ekki fá of mikla athygli á svona sprengingu. Fólk á til að safnast að þegar sprengingar eru og það hafi verið öryggismál. En það eru ekki rök sem við tökum gild. Við getum alltaf tryggt að fólk komist ekki að þegar sprenging á sér stað.“

Eftir klúðrið var nærliggjandi götu, Faxabraut, lokað og verður hún að sögn Sævars lokuð af öryggisástæðum þar til turnarnir eru endanlega fallnir.

Verið er að undirbúa næstu atlögu að sílóunum og að sögn Sævars verður gefin út tilkynning á næstu dögum. Niðurrif á öðrum byggingum á Sementsreitnum heldur þó áfram og gengur vel.