Segja yfirmann hafa brotið á flugvirkjum

„Ef starf hefur verið í höndum ákveðinnar iðnstéttar í áratugi er því ekkert breytt með því að einhverjum dettur það í hug einn morguninn,“ segir Óskar Einarsson, formaður Flugvirkjafélags Íslands, sem telur tæknistjóra hjá Icelandair hafa gengið í störf flugvirkja í verkfalli fyrir jól.

Að morgni verkfallsdagsins 17. desember tók Jens Þórðarson, þáverandi framkvæmdastjóri tæknisviðs Icelandair, af hlífar sem settar höfðu verið yfir hreyfla og læsingar í lendingarbúnaði tveggja farþegaþota Icelandair. Sömuleiðis hlífar af nemum á vélunum sem gefa upplýsingar um hæð og hraða.

„Þessar vélar voru útskrifaðar af flugvirkjum nema að flugvirki átti eftir að leggja lokahönd á að gera vélarnar tilbúnar undir brottför með því að fjarlægja þessar hlífar,“ segir Óskar. „Hann tók upp hjá sjálfum sér að taka þessar hlífar af og kvitta fyrir það verk í log-bækur vélanna sem á að vera í höndum flugvirkja eða flugmanna.“

Óskar segir Jens ekki vera flugvirkja. „Við lítum þetta alvarlegum augum. Hann tekur sér það bessaleyfi að ganga í þessi störf og fullvissar flugmenn um að hann sé að gera hluti sem hann hafi rétt til að gera,“ segir hann. Flugvirkjafélagið sé að íhuga næstu skref. „Ég er ekki búinn að skoða ofan í kjölinn hvað má samkvæmt ýtrustu reglugerðum en úr þessu þarf að skera.“

Jens hafnar því að hann hafi verið í órétti er hann tók vetrarvarnirnar af vélunum. „Það krefst ekki flugvirkjamenntunar en engu að síður hefur verið hefð fyrir því að flugvirkjar geri þetta,“ segir Jens. Hann hafi skráð verkið í log-bækur en gert það á annan hátt en flugvirkjar geri.

Að sögn Jens fólst í verkum hans ekkert frávik frá reglum eða reglugerðarumhverfi. „Við tökum það eins alvarlega og flugrekandi getur gert og það er ekki verið að víkja frá því. Hins vegar er þetta aðeins öðruvísi en venjulega og það er fullkomlega löglegt,“ segir Jens sem kveðst sjálfur þegar hafa sent Samgöngustofu ábendingu um málið með útskýringum.

„Ég hef kannað þetta ítarlega og margstaðfest að ég hafi ekki gert neitt sem var ekki heimilt þennan morgun,“ segir Jens sem nú hefur tekið við starfi sem framkvæmdastjóri rekstrarsviðs Icelandair.