Mourinho er búinn að gefast upp á titlinum

Jose Mourinho, knattspyrnustjóri Manchester United, segir það ómögulegt fyrir lið sitt að vinna upp forystu Manchester City í ensku úrvalsdeildinni.

Untied tapaði fyrir Tottenham á útivelli í vikunni á meðan City vann WBA og komst því í 15 stiga forystu í deildinni þegar 13 umferðir eru eftir.

„Við þurfum stigin til þess að verða fyrstir af þeim síðustu. Við verðum að reyna að enda í öðru sæti,“ sagði Mourinho á blaðamannafundi fyrir leik United og Huddersfield á Old Trafford á morgun.

„Það er mjög mikilvægt fyrir okkur að gera betur en á síðasta tímabili og vinna eitthvað og verða sterkari á næsta tímabili.“

Tölfræðilega er ekki ómögulegt fyrir United að ná City, en það verður að teljast afar ólíklegt að liðið missi niður svo stóra forystu á lokasprettinum.

Hins vegar er baráttan um hin toppsætin mjög hörð, aðeins fimm stig skilja að United í öðru sæti og Tottenham í fimmta sætinu.

„City er að gera mjög vel í því að hleypa engum nálægt sér. Á eðlilegu tímabili værum við í baráttunni miðað við stigafjöldan sem við erum með. Baráttan er enn opin um annað, þriðja og fjórða sæti en hún er svo gott sem lokuð um toppsætið,“ sagði Jose Mourinho.