Dómstólar ósammála um greiðslugetu Sindra

Sindri Sveinsson, fyrrverandi starfsmaður eiginfjárfestinga Landsbankans, sem hlaut níu mánaða fangelsisdóm í markaðsmisnotkunarmáli í febrúar 2016, þarf að greiða 22,6 milljónir króna í málskostnað vegna þess máls. Þetta er niðurstaða Hæstaréttar Íslands.

Héraðsdómur Reykjaness úrskurðaði í desember síðastliðnum að lækka upphæð fjárnáms sem gert var hjá Sindra upp á rúmar 22 milljónir króna niður í tvær milljónir. Sindra hafði í markaðsmisnotkunarmáli Landsbankans verið gert að greiða málsvarnarlaun verjanda síns, Reimars Péturssonar.

Laun Reimars voru greidd úr ríkissjóði sem hóf í kjölfarið að krefja Sindra um endurgreiðslu. Sindri kvaðst ekki vera borgunarmaður fyrir upphæðinni og var því farið fram á að upphæðin yrði sótt með aðför en fjárnám reyndist árangurslaust.

Sindri stefndi gerðarbeiðanda, í þessu tilfelli sýslumanninum á höfuðborgarsvæðinu, og krafðist þess að krafan yrði lækkuð. Hann héldi látlaust heimili með eiginkonu sinni, greiddi af fasteignalánum en að húsið væri séreign konu hans. Hann væri eignalaus. Í málinu lagði hann fram kaupmála, dagsettan 27. maí 2013, því til sönnunar þar sem hann færði eignarhlut sinn í fasteigninni yfir á eiginkonu sína.

Í dómi Hæstaréttar kemur fram að þegar kaupmálinn var gerður hafi sakamálið verið höfðað á hendur honum rúmum tveimur mánuðum áður. Af þeim sökum hafi sýslumaður getað leitað fullnustu með fjárnámi í hlut fasteignarinnar sem hefði án kaupmálans verið í eigu Sindra.

Hæstiréttur segir að fram hafi komið í gögnum sem Sindri lagði fram að hann hafi um árabil verið með talsverðar tekjur. Ekki hefði verið leitt í ljós að fjárhagur hans væri með því móti að falla bæri frá kröfu á hendur honum um greiðslu sakarkostnaðar. Ekki væri því tilefni til að taka til greina kröfu hans um að fjárnáminu yrði breytt.