Mourinho ætlar ekki að eyða miklu í sumar

„Við munum ekki gera neitt klikkað,“ segir Jose Mourinho, knattspyrnustjóri Manchester United, varðandi leikmannamarkað liðsins í sumar.

Þessu svaraði Mourinho aðspurður hvort nauðsynlegt væri fyrir liðið að taka upp veskið í sumar til þess að ná nágrönnunum í Manchester City. City liðið hefur eytt 448 milljónum punda á leikmannamarkaðnum síðan Guardiola tók við liðinu.

„Við reynum að bæta okkur á næsta tímabili, en við sjáum hvað gerist. Kannski á City líka eftir að eyða miklu og enginn hefur möguleika á að ná þeim.“

Mourinho sagði þó að þetta snerist ekki einungis um baráttu nágrannaliðanna frá Manchester. Titilbarátta næsta tímabils muni koma frá sex liðum.

„Þetta snýst ekki um okkur og þá, þetta snýst um okkur, þá, Liverpool, Arsenal, Chelsea og Tottenham. Þetta er ekki bara City og United. Þetta snýst um sex lið.“