„Grétar Þór“ og „L+O“ skrifað í mosann"

Í dag var reynt að gera við þær skemmdir sem unnar voru á mosa í náttúrunni á Nesjavöllum fyrir skemmstu. Það getur tekið mosa áratugi að byggjast upp aftur en sú aðferð sem notuð var við lagfæringarnar styttir þennan tíma niður um fimm ár.

Óprúttnir aðilar skrifuðu skilaboð í mosann hér í Litlu-Svínahlíð í Grafningi fyrir nokkrum vikum. Í dag er hins vegar hópur fólks kominn til þess að laga skemmdirnar.

Aðkoman var ekki góð fyrir um tveimur vikum. Ögrandi skilaboðum komið á framfæri og um leið sett lýti í náttúruna. Svæðið er á virkjunarsvæði Orku náttúrunnar en Nesjavellir eru ein af náttúruperlum Íslands.

„Þetta er bara svo mikið lýti á landinu og við vildum bara laga þetta svo fólk sé ekki að fá einhverjar slæmar hugmyndir og herma eftir þessu. Þetta tekur alveg mörg mörg ár eða áratugi að jafna sig. Ég man eftir skemmdum frá því að ég man fyrst eftir mér í Vífilfelli og þetta er enn fjörutíu árum seinna,“ segir Magnea Magnúsdóttir, umhverfis- og landgræðslustjóri hjá Orku náttúrunnar.

Með þessari aðferð við að laga mosann tekur það hann nokkur ár að binda sig saman þar til hann er fullgróinn en þeir sem frömdu þessi skemmdaverk eru ófundnir.

„Við vitum ekkert um þá, en það eru einhver nöfn hérna. Það er til dæmis „Grétar“ og „L + O“. Það gefur ákveðnar vísbendingar. Það eru einhverju að skilja minnisvarða eftir sig,“ segir Magnea.

Orka náttúrunnar er í mörgum upp- og landgræðsluverkefnum á virkjunarsvæðum sínum. Til að mynda eru víðigræðlingar klipptir og gróðursettir, mosa og grasfræjum er dreift og rusl er tínt. Sú aðferð sem notast var við að laga mosann í dag hefur reynst vel eins og sjá má í myndskeiðinu hér að neðan.