Bíræfinn þjófur með smekk fyrir myndlist

„Þetta er falleg sýning og eftirsóknarverðir munir en það var fulllangt gengið að taka verkið af veggnum,“ segir Andri Lúthersson en hann elti uppi þjóf á föstudaginn sem hafði stolið verki úr seríunni Angles eftir listakonuna Jeanine Cohen úr Hverfisgalleríi.

Eiginkona Andra, Sigríður L. Gunnarsdóttir, á og rekur galleríið. Andri segir að þjófurinn hafi greinilega góðan smekk því verkið sé fallegt. „Ég var bara eiginmaður á gólfi að reyna að aðstoða eitthvað. Svo verður mér starsýnt á mann sem kemur inn, því það klingir bjalla þegar einhver kemur inn eða fer út úr galleríinu. Maðurinn gekk hröðum skrefum inn í aðalsalinn þar sem þessi fallega sýning, The space between eftir Cohen stendur. Hann stóð við aðalvegginn í nokkrar sekúndur og mér fannst þetta strax eitthvað skrítið.

Þegar ég heyri aftur í bjöllunni fór ég inn í sal og sá strax að það vantaði verk á vegginn. Þannig að ég hljóp út á götu og sá kauða með verkið undir höndunum og elti hann uppi. Reif í öxlina á honum og spurði hvað hann væri eiginlega að gera. Hann svaraði frekar rólega: „Ég veit það ekki alveg,“ réttir mér verkið og gengur rólega burt.

Þannig að ég gekk til baka, hengdi verkið upp og settist aftur í stólinn minn hálf hissa á þessu öllu saman,“ segir Andri.

Hann segir að verkið sé óskemmt og hann hafi aldrei lent í álíka lífsreynslu. „Listþráin bar þjófinn greinilega ofurliði. En verkið er fallegt og þetta er smekkmaður, en í galleríinu er allt til sölu í en ekki til sjálftöku,“ segir hann léttur. „Hann var með talsverða upphæð undir hendinni þar sem hann gekk eftir Hverfisgötunni. Maðurinn var vel til fara og þetta tók ekki nema svona 12-15 sekúndur.“

Sigríður varð ekki þjófsins vör og brá eðlilega þegar Andri gekk inn í galleríið með verkið og söguna sem hafði góðan endi. „Hún vissi ekki af þessu, ekki fyrr en ég var búinn að setja verkið aftur upp og kominn á minn stað í stólinn.“ Sýningu Cohen lauk um helgina en fram undan eru fjölmargar spennandi sýningar. „Þetta er kannski til marks um samtímalistasenuna á Íslandi, hér er margt að gerast og fólk hefur áhuga en þetta var full mikill áhugi sem þessi ungi maður sýndi.“