Fengu persónulega afsökunarbeiðni og bensínkostnaðinn endurgreiddan

Framkvæmdastjóri Strætó hefur beðið Berglindi Elíasdóttur og 16 ára dóttur hennar afsökunar á því hvernig fyrirtækið brást við frétt Vísis þess efnis að dóttirin hefði verið skilin eftir í Varmahlíð á miðvikudag. Þá hefur eldsneytiskostnaður Berglindar milli Akureyrar og Varmahlíðar verið endurgreiddur.

Stúlkan fékk þær upplýsingar að hún yrði sótt með næsta vagni sem myndi stoppa í Varmahlíð, en vagnstjóri þeirrar ferðar fékk engin skilaboð um að sækja ætti stúlkuna. 

Sjá einnig: Stúlka stungin af og skilin ein eftir á mannlausu hóteli.

Frétt Vísis af málinu í gær vakti mikla athygli og hörð viðbrögð, eins og athugasemdakerfi fréttarinnar ber með sér. 

Stúlkan var á leið frá Reykjavík til Akureyrar á miðvikudagskvöld en í Varmahlíð komst strætóinn ekki lengra vegna ófærðar. Var ákveðið var að stúlkan og strætóbílstjórinn, sem voru tvö eftir í strætónum, myndu gista á hóteli í Varmahlíð yfir nótt.

Strætó útvegaði og greiddi gistinguna og ferð hennar átti síðan að halda áfram með sama vagni daginn eftir.

„Morguninn eftir þóttu aðstæður á Öxnadalsheiði ennþá nokkuð erfiðar og því var tekin ákvörðun að láta vagninn sem stúlkan kom upphaflega með keyra suður til Reykjavíkur og hún myndi taka næsta vagn sem var á leið til Akureyrar. Sá vagn var áætlaður í Varmahlíð klukkan 14:18,“ segir í yfirlýsingu frá Strætó.

„Stúlkan fékk þau skilaboð að hún yrði sótt á hótelið og því bjóst hún við símtali frá Strætó þegar vagninn kæmi eða að einhver myndi koma inn á hótel og ná í hana. Vagnstjórinn sem kom klukkan 14:18 fékk hins vegar ekki nein skilaboð um farþega sem þurfti að sækja sérstaklega og hélt því sinni reglubundnu áætlun áfram. Atvikið var frávik á þjónustu Strætó sem kallaði á aukna eftirfylgni, en því miður brást fyrirtækið í samskiptum sínum innbyrðis og við Berglindi," útskýrir Strætó ennfremur.

Þar kemur jafnframt fram að Jóhannes Rúnarsson, framkvæmdastjóri Strætó, hafi haft samband við Berglindi í morgun og bað hann mæðgurnar persónulega afsökunar. 

„Ég var ekki með nægilegar upplýsingar um málið þegar blaðamaður hringdi í mig klukkan 22:00 í gærkvöldi. Upphaflega heyrði ég að stúlkan hefði einfaldlega ekki mætt á stoppistöðina þegar vagninn kom klukkan 14:18. Ég hefði mátt vanda orðavalið betur þegar ég sagði að við værum ekki að halda í höndina á viðskiptavinum. Svar mitt átti að endurspegla meginreglu almenningssamgangna um að viðskiptavinir bera ábyrgð á að koma sér á biðstöðvar o.sfrv. Mál stúlkunnar var óvenjulegt frávik á þjónustu okkar og hefðum við átt að halda betur í hönd dóttur Berglindar en meginreglan segir til um,“ segir Jóhannes í yfirlýsingunni sem lesa má hér að neðan.