Dúkkurnar lífguðu upp á skólastarfið

„Draumurinn er að endurlífgun verði að skólaskyldu í framtíðinni á Íslandi,“ segir Elín Freyja Hauksdóttir, læknir og meðlimur í Björgunarfélagi Hornafjarðar, en bæjarráðið þar samþykkti að kaupa þrjátíu endurlífgunardúkkur á fundi sínum.

Endurlífgun hefur verið skylda í grunnskólum í Danmörku í nokkur ár og þegar tölur eru bornar saman um hversu margir fengu endurlífgun við hjartastopp utan spítala fyrir og eftir að verkefnið byrjaði, var niðurstaðan sláandi. Í ljós kom að helmingi fleiri í hjartastoppi fengu endurlífgun en áður og þriðjungi fleiri lifðu af.

Verkefnið ber heitið Kids save lives og er kjarni þessa verkefnis að kenna árlega börnum frá 12 ára aldri endurlífgun, helst sem hluta af skólaskyldunni og þannig stuðla að því að fleiri fullorðnir kunni rétt viðbrögð þegar á reynir.

„Þetta kostar lítið og að kenna krökkunum réttu handtökin fylgja engar aukaverkanir sem slíkar. Ég greip þetta á lofti eftir að hafa setið ráðstefnu hér á landi í september þar sem fjallað var um verkefnið. Draumurinn er að fleiri sveitarfélög taki þetta upp og þetta verði hluti af skólaskyldunni. Þegar á reynir verður þetta eðlilegt að kunna og að hjálpa náunganum,“ segir Elín.

Hún segir að sveitarfélagið sé það fyrsta á landinu sem taki verkefnið upp samkvæmt þeim skilgreiningum sem það hefur. „Ég veit að það hefur verið farið í einstaka bekki í Reykjavík en ekki í alla bekki í öllum skólunum. Við tókum sjöunda, áttunda og níunda bekk á einum degi. Tíundi bekkur fær heilan dag með Rauða krossinum í maí eins og venjulega og því var hann undanskilinn.“

Hún segir að börnin hafi staðið sig gríðarlega vel og það hafi verið skemmtilegt að sjá hvað þau náðu tækninni og taktinum fljótt. „Maður getur því ímyndað sér hvað þau væru orðin góð ef þetta væri gert árlega.

Það voru unglingar, sem ég hafði þjálfað í þetta verkefni, sem sáu um kennsluna. Jafningjafræðsla gefur í mörgum tilfellum betri árangur og þótti mér því upplagt að reyna það hér. Við vorum þeim svo þarna til halds og trausts og til tryggja að öll mikilvægu atriðin væru með.“