Hundruð sóknarbarna farin úr Breiðholtssókn

Sóknarbörnum í Breiðholtssókn í Reykjavík hefur fækkað svo mikið undanfarið að tekjur standa ekki lengur undir rekstri safnaðarins. Til að bregðast við þessu hefur sóknin rætt við aðrar sóknir í Breiðholti um sameiningu.

„En við erum skuldlaus. Við skuldum 1,5 milljónir sem verða greiddar upp á þessu ári og næsta,“ segir Inga Rún Ólafsdóttir, formaður sóknarnefndar, en bætir við að rekstrarreikningurinn fyrir síðasta ár, sem kynntur var um helgina, hafi verið um 300 þúsund krónur í mínus. „Við höfum rekið þetta af mikilli ábyrgð og útsjónarsemi en það verður ekki lengra komist með það. Það er algjörlega fyrirséð,“ segir Inga Rún.

Inga Rún segir að frá árinu 2010 hafi sóknarbörnum fækkað um 800 og séu nú rétt tæplega 1.900. Skýringarnar á fækkuninni séu margvíslega. Í fyrsta lagi þjóni söfnuðurinn litlu hverfi, Bakka- og Stekkjahverfi. Í öðru lagi séu margir útlendingar að flytja í hverfið, sem ef til vill eru ekki í þjóðkirkjunni. Í þriðja lagi er að fækka í hverfinu vegna þess að börn flytja að heiman og hverfið ekki eins ungt og áður var. „Það hefur fækkað gríðarlega mikið og hratt og þetta er svo sem það sem margir aðrir söfnuðir standa frammi fyrir,“ segir hún. Inga Rún segir auk þess að sóknargjöld hafi verið skert í mörg ár og það segi til sín í rekstrinum.

„Það sem við erum að gera er að við erum í samtali við nágrannasóknirnar um sameiningu. Við erum núna að tala við Fella- og Hólasókn,“ segir hún en áður hafi sóknin talað við Seljasókn, án þess að nokkuð kæmi út úr því samtali. Hún bendir á að við sameiningu myndi rekstrareiningin stækka og það gæti skilað einhverri hagræðingu.

Inga Rún segir að margar sóknir standi í nákvæmlega þessum sömu sporum og séu að skoða sameiningu. „Þetta er kannski vandi sem kirkjan stendur frammi fyrir almennt,“ segir Inga Rún.