Ákærðir fyrir innflutning á sögulegu magni af amfetamínbasa

Héraðssaksóknari hefur ákært tvo pólska karlmenn á sextugsaldri fyrir innflutning á 11,5 lítrum af amfetamínbasa 3. október síðastliðinn. Basinn var falinn í bensíntanki bifreiðar sem þeir fluttu til landsins með Norrænu. RÚV greindi fyrst frá þessu.

Hægt hefði verið að framleiða um 150 kíló af amfetamíni úr vökvanum. Samkvæmt ákærunni óku þeir frá Varsjá í Póllandi til Þýskalands, þaðan til Hirtshals í Danmörku og fóru svo með Norrænu til Seyðisfjarðar með viðkomu í Þórshöfn í Færeyjum. Þar fundu tollverðir svo amfetamínbasann falinn í bensíntanki bílsins í 23 hálfs lítra plastflöskum. Mennirnir hafa setið í gæsluvarðhaldi síðan.

Sjá einnig: Fundu sögulegt magn af amfetamínbasa í Norrænu

Eins og Vísir hefur greint frá hafa mennirnir tveir báðir neitað að hafa vitað að þeir flyttu efnin. Upphaflega sögðust þeir báðir hafa komið hingað frá Póllandi í leit að vinnu. Síðar viðurkenndi annar þeirra að að tilgangur ferðarinnar hingað til lands hafi verið að sækja hingað peninga og fara með þá aftur til baka til Póllands fyrir mann sem hann þekkir í Póllandi.

Sögulegt magn amfetamínbasa

Aðeins einu sinni hefur verið lagt hald á meira magn af amfetamínbasa en það var árið 2010 þegar tvær konur smygluðu tæplega 20 lítrum til landsins eftir sömu leið. 

Amfetamínbasi er fljótandi amfetamín sem notað er til að framleiða amfetamínduft. Styrkleiki amfetamíns sem dreift er hér á markaði er að meðaltali 5,8 prósent samkvæmt rannsóknum sem hafa verið gerðar hér á landi. Sé miðað við þennan styrkleika er að öllum líkindum hægt að nota 11 lítra af basa til að framleiða um 150 kíló af amfetamíndufti.

Málið var unnið af tollyfirvöldum á Íslandi í samstarfi við tollgæsluna í Færeyjum.Í umfjöllun Stöðvar 2 um málið í síðasta mánuði sagði lögreglan að ljóst væri að fleiri aðilar tengist málinu.