Katrín Jakobsdóttir fær umboð frá forseta í dag

Katrín Jakobsdóttir heldur á fund forseta í dag og tekur við umboði til að mynda ríkisstjórn. Þótt fyrir liggi drög að málefnasamningi flokkanna sem stefna að myndun ríkisstjórnar er enn mikið verk fyrir höndum og margt sem enn er óráðið bæði um stjórnina og kosningu í ýmis lykilembætti þingsins. Skipting ráðuneyta liggur ekki endanlega fyrir en samkvæmt heimildum Fréttablaðsins munu formenn flokkanna eiga fundi með hverjum og einum þingmanni sínum í dag til að ræða skipun ráðuneyta og ráðherraefni flokksins.

Einnig er eftir að leggja drög að skipun fastanefnda þingsins enda erfiðleikum bundið meðan ekki liggur fyrir hvort stjórnin hefur 35 eða 33 þingmenn að baki sér, en eins og kunnugt er hafa Andrés Ingi Jónsson og Rósa Björk Brynjólfsdóttir verið mjög efins um samstarf flokkanna og greiddu atkvæði gegn því að VG færi í viðræður um myndun þeirrar ríkisstjórnar sem nú er í fæðingu.

Oddvitar verðandi stjórnarflokka hafa lagt til við formenn annarra flokka að flokkarnir í minnihluta hafi formennsku í þremur nefndum: stjórnskipunar- og eftirlitsnefnd, velferðarnefnd og umhverfis- og samgöngunefnd. Formennska þessara nefnda fer því til Miðflokksins, Samfylkingar og Pírata nema um annað verði samið. Ekki liggur heldur fyrir hvernig forsætisnefnd verður skipuð, að öðru leyti en því að Vinstri græn hreppa embætti forseta þingsins fyrir Steingrím J. Sigfússon. Um það mun vera orðin samstaða samkvæmt heimildum Fréttablaðsins.

Formennirnir þykja halda spilum mjög þétt að sér og þingmenn flokkanna hafa enn ekki fengið að sjá heildarmyndina. Málefnasamningurinn verður kynntur flokksráðs- og miðstjórnarfulltrúum flokkanna á miðvikudaginn en liggja mun fyrir á miðvikudagskvöld hvort málefnasamningur og skipting ráðuneyta verður samþykkt af þessum stofnunum flokkanna. Fari svo verða ráðherraefnin kynnt á fimmtudag. Gangi allt eftir eins og stefnt er að verður ný ríkisstjórn skipuð á Bessastöðum strax á fimmtudag.

Auk þess að reka smiðshöggið á nýja ríkisstjórn og skipa í lykilstöður þingsins, þarf hin nýja stjórn að smíða fjárlög í miklu snatri en stefnt er að því að þing verði sett 15. desember.