Heilu brettin af Arnaldi mokast út

Sjö þúsund eintök nýju bókar Arnaldar Indriðasonar, Myrkrið veit, hafa nú verið send af lager forleggjara hans í búðir.

„Þetta er um 35 prósenta aukning frá í fyrra á sama tíma,“ segir Egill Örn Jóhannsson framkvæmdastjóri Forlagsins.

Hann segir að þetta komi sér mjög á óvart. „Enda allir miðlar undirlagðir af kosningaumfjöllun og af stjórnarmyndun. En segir mér það að þjóðinni þyrstir í annars konar afþreyingu en þá sápuóperu sem er á boðstólnum,“ segir Egill Örn.

Víst er að kosningarnar og svo stjórnarmyndunarviðræðurnar komu flatt uppá marga, ekki síst bókaútgefendur sem eru komnir í spreng með sitt jólabókaflóð; það ætti að vera farið að flæða að með bækurnar ef allt væri eðlilegt.

„Ég held jafnframt líka að þjóðin hafi jafnvel vaknað til vitundar um mikilvægi bóklestrar í kjölfar frétta af versnandi stöðu bókaútgáfunnar, en við höfum fundið gríðarlegan meðbyr meðal almennings síðan þetta birtist í fréttum og sala almennt tekið góðan kipp,“ segir útgefandinn brattur.

Forlagið lætur prenta vel á 3. tug þúsunda bóka hverju sinni þegar Arnaldur á í hlut. Þannig hefur það verið mörg undanfarin ár. Egill Örn segir Arnald hafa verið söluhæstan í fyrra, sem svo oft áður og öruggur á toppnum. Forleggjarar eru tregir að gefa út upplagstölur en Arnaldur seldi um 20 þúsund eintök í fyrra. Samkvæmt því hvernig gangurinn er á þessu nú þarf eitthvað mikið að koma til ef einhver nær að velta þessum konungi bóksölunnar af stalli þetta árið.