Utanríkisráðherra Noregs segir af sér

Børge Brende, utanríkisráðherra Noregs, hefur sagt af sér embætti. Hann mun þess í stað taka við stöðu yfirmanns Alþjóðaefnahagsráðsins. Ekki liggur fyrir hver mun setjast í ráðherrastól í stað hans en hann verður ráðherra áfram þar til um miðjan október.

„Það hafa verið forréttindi að vera utanríkisráðherra í fjögur krefjandi og spennandi ár,“ sagði Brende á blaðamannafundi í morgun samkvæmt frétt VG.

Brende sagðist hafa tekið ákvörðunina í síðustu viku og að hann hafi viljað tilkynna það sem fyrst. 

Erna Solberg, forsætisráðherra, var einnig á blaðamannafundinum. Þakkaði hún Brende fyrir störf sín og óskaði honum velfarnaðar í nýju starfi.

Kosningum í Noregi er nýlokið og stjórnarmyndunarviðræður í gangi.