Amis hitti loks „mömmu“ sína á Íslandi

Það var hjartnæm stund þegar Kara Rut Hanssen hitti Amis Agaba í fyrsta sinn í Kópavogi á dögunum. Allt frá því að Kara byrjaði að styrkja Amis mánaðarlega hefur hann kallað Köru mömmu sína, enda segist hann eiga henni allt að þakka.

Fjallað var um heimsóknina í Íslandi í dag í gærkvöldi en Amis er frá Úganda, fæddist munaðarlaus og ólst upp á munaðarleysingjahæli. Þegar hann fór í barnaskóla á vegum ABC Barnahjálpar kom fljótt í ljós að hann væri góður nemandi og mikill íþróttamaður.

Kara Rut hefur stutt við bakið á Amis undanfarin 9 ár og segist hún reglulega hafa fengið fréttir og myndir af honum. Kara, sem 27 ára gömul, fannst því frekar fyndið að Amis, sem er ekki nema fjórum árum yngri en hún, skildi kalla hana mömmu sína.

Það ætti þó engan að undra, með mánaðarlegu framlagi Köru gerði hún Amis kleift að klára grunnskólann, fara reglulega til læknis og kaupa sér að borða.

Fékk skólastyrk til Svíþjóðar

Sem fyrr segir reyndist Amis vera góður náms- og íþróttamaður og nældi hann sér í skólastyrk til að halda námi sínu áfram í Gautaborg. Þegar þangað var komið áttuðu starfsmenn íþróttafélagsins, þar sem hann lagði stund á hlaup, sig á að um væri að ræða engan venjulegan íþróttamann.

Amis er nú 23 ára gamall, orðinn sænskur ríkisborgari og stundar nám í háskóla í Malmö. Hann segist alltaf hafa langað til að hitta Köru og keypti hann sér því miða í fríinu til Íslands. Hann mætti á skrifstofu á ABC - og þá fékk Kara símtalið.

„Manstu eftir stráknum sem þú byrjaðir að styrkja árið 2009? Hann situr bara hérna við hliðina á mér,“ lýsir Kara og segir það hafa komið sér rækilega á óvart. Hún hafi bara farið að hlæja og þótt þetta „klikkað.“ Kara segist ekki hafa heyrt um það áður að styrktarbörn komi til landsins og leitað að „foreldrum“ sínum - enda er það fordæmalaust hér á landi.

Kallar hana enn mömmu

Það var svo við heimili Köru í Kópavogi sem þau loks hittust á dögunum. Það var tilfinningaþrungin stund þegar Amis faðmaði „móður sína“ og átti hann erfitt með að koma þakklæti og tilfinningum sínum í orð.

„Ég veit ekki hvernig ég á að útskýra það, þetta er handan mínum skilningi. Ég hef beðið eftir þessu alla mína tíð,“ sagði Amis og bætti við að hann liti á Köru sem kynmóður sína, í ljósi þess að hann ætti ekki slíka.

Hann sagðist handviss um að hann myndi einn daginn hitta Köru, ef Guð væri til. „Ég er þar sem ég er í dag vegna fjárstuðnings hennar. Hún er mamma mín, ég segi það ennþá.“

Innslag Sindra Sindrasonar um þau Köru og Amis má sjá í spilaranum hér að ofan.