Alltaf stóð til að rífa Steinnes: Segja það hluta af langtímamarkmiði

Ekki var gert ráð fyrir að rífa húsið Steinnes á Akureyri samstundis heldur hafi það verið hluti af langtímamarkmiði vegna deiliskipulagsmála við íþróttasvæði Þórs. Jafnframt er tekið fram að allur fréttaflutningur um nýlega breytingu á deiliskipulagi þar sem húsið verði nýtt til íbúðar séu rangar. Þetta kemur fram í yfirlýsingu frá Akureyrarbæ.

Í tilkynningunni kemur fram að Akureyrarbær hafi engan hag af því að eignast húsið annan en að byggja upp íþróttasvæði bæjarins. Ekki sé hins vegar búið að ákveða hvenær eigi að fjarlægja húsið en áform um niðurrif standi áfram óbreytt.

Húsið stendur nálægt lóð íþróttafélagsins Þórs.  Bærinn keypti húsið af eigandanum, Níels Karlssyni, árið 2008 og gerðu samkomulag við seljanda um leigu til ársins 2014. Leigjandi lagði síðan fram beiðni þess efnis að leigan yrði framlengd til ársins 2017. Leigjendur óskuðu síðar eftir framlengingu á þessu ári en ekki náðust samningar um það.

Taldi á sér brotið

Fjallað hefur verið um málefni fyrrverandi eiganda hússins í fjölmiðlum undanfarið þar sem hann sagði farir sínar ekki sléttar í samskiptum við Akureyrarbæ. Hann hafi neyðst til að selja bænum húsið ellegar að það yrði tekið eignarnámi. Eftir að hafa litið yfir nýtt deiliskipulagi frá 2018 til 2030 túlkaði Níels það á þann veg að húsið gæti verið nýtt til íbúðar. Fannst honum á sér brotið vegna þessa þar sem hann hafi neyðst til að yfirgefa heimili sitt.

„Eðlilega fylgja málum sem þessum tilfinningar. Húsinu hefur verið vel við haldið og fullur skilningur er á að erfitt sé að segja skilið við eignina. Þar sem fyrri eigendur höfðu ekki hug á að taka tilboði bæjarins um framlengdan leigusamning þótti þó rétt að nýta húsið áfram og var ákveðið að leigja það tímabundið fyrir sýrlenska fjölskyldu sem kom til bæjarins sem flóttafólk í ársbyrjun 2016,“ segir í tilkynningunni.