Íbúar fá lánaðar skóflur og hrífur

Borgarbyggð „Með þessu er verið að koma til móts við þá íbúa sem vilja leggja sitt af mörkum til að snyrta og fegra sitt nánasta umhverfi en eiga ekki öll tól og tæki sem til þarf,“ segir í frétt á vef Borgarbyggðar um átak þar í sumar. „Ákveðið hefur verið að fara í tilraunaverkefni með íbúum sem felst í að lána íbúum garðáhöld, til dæmis skóflur, garð- og heyhrífur, pilljárn og heyhrífur,“ segir í fréttinni. Íbúarnir geta fengið áhöldin að láni hjá flokkstjóra Vinnuskólans. „Verkefnið verður reynt með þessum hætti í Borgarnesi í sumar og hugsanlega þróað frekar ef vel tekst til.“ – gar