Þrír handteknir í tengslum við fíkniefnamál á Ísafirði

Lögreglan á Vestfjörðum hefur handtekið tvo karlmenn og eina konu vegna rannsóknar á fíkniefnamáli. Handtakan kom í kjölfar húsleitar sem framkvæmd var í gær í tveimur íbúðum á Ísafirði. Þar fundust, að því er lögregla telur, 70 grömm af marihuana og um 80 grömm af því sem talið er vera amfetamín og kókaín.Einnig fundust áhöld sem eru talin tengjast meðhöndlun fíkniefna. Einn þremenninganna hefur einnig verið kærður fyrir akstur undir áhrifum fíkniefna. Fólkið hefur allt komið við sögu lögreglu og var í haldi fram á nótt.