Vilja fá kynjavakt á þing

Sjö þingmenn vinstri grænna hafa lagt fram þingsályktunartillögu um að kynjavakt verið komið á fót á Alþingi. Kynjavaktinni er ætlað að greina raunveruleg áhrif karla og kvenna á þingi og gera úttekt á jafnréttisreglum og lögum sem eru í gildi.

Hlutverk kynjavaktar Alþingis væri meðal annars að gera úttekt á því hvort og hvernig kyn hefur áhrif á ákvarðanatöku innan þingsins. Kolbeinn Óttarsson Proppé, fyrsti flutningsmaður tillögunnar, segir þannig hægt að sýna fram á raunverulega stöðu kynjanna.

„Þetta snýst ekki um að telja hausa, um hve margar konur vinni þarna og hve margir karlar, heldur um að meta áhrif hvors kyns fyrir sig," segir Kolbeinn en það yrði gert með ákveðnum vísum sem mæla áhrif kvenna og karla í tilteknu samfélagi, yfir ákveðið tímabil.

„Alþjóðaþingmannasambandið gefur út þessa vísa, sem kallast kynnæmir vísar í íslenskri þýðingu, og hafa verið notaðir víða um heim á þjóðþingum og talið gott tæki til að meta þessa stöðu."

Einnig yrði skoðað hvernig ályktunum Alþingis og aðgerðaáætlunum ríkisstjórna í jafnréttismálum hefur verið framfylgt.

„Og koma upp eftirfylgni með þeim. Það hefur stundum skort á að þessum, oft á tíðum fínu tillögum sem eru samþykktar, sé fylgt nægilega vel eftir," segir Kolbeinn og tekur til dæmis að ekki hafi verið gerð heildstæð aðgerðaáætlun varðandi kynbundið ofbeldi síðan 2011.

Kolbeinn segir kynjavakt mikilvæga þrátt fyrir að konur séu nær helmingur þingmanna.

„Já, það er alltaf þörf fyrir þetta og það hversu stórt hlutfall þingmanna eru konur - það getur alltaf breyst í næstu kosningum. Ef kynjavakt verður komið á fót þá yrði fylgst með á hverju ári hvernig staðan er og eins og ég segi þetta snýst ekki bara um að telja hausa, heldur líka meta raunveruleg áhrif."