Risareikningur gæti beðið flugdólgs sem var skilinn eftir í Keflavík af Lufthansa

Flugstjóri breiðþotu á vegum þýska flugfélagsins Lufthansa þurfti að millilenda á Keflavíkurflugvelli vegna dólgsláta farþega í áætlunarferð frá Los Angeles í Bandaríkjunum til München í Þýskalandi í gær.

Það var þýska dagblaðið TZ sem greindi fyrst frá málinu á vef sínum en Ríkisútvarpið greindi frá málinu á vef sínum fyrr í dag.

Man ekki eftir öðru eins máli

Í umfjöllun TZ er vitnað í talskonu Lufthansa sem segist ekki muna eftir öðru eins máli.  Það sé afar sjaldgæft að það þurfi að millilenda vegna óláta farþega því í flestum tilvikum nái áhöfnin að róa þá niður. Í þessu tilviki þurfti hins vegar að tjóðra konuna við sæti hennar með límbandi.

Um tveir þriðju af ferðinni voru að baki þegar flugstjórinn tilkynnti farþegunum 260 að lent yrði í Keflavík vegna konunnar.

Talskona Lufthansa segist ekki geta skorið úr um hvort konan hafi verið undir áhrifum áfengis eða lyfja.

Þurfti að redda sér sjálf

Samkvæmt upplýsingum frá lögreglunni á Suðurnesjum var lögreglunni tilkynnt um málið í gærkvöldi og fór til Keflavíkurflugvallar þar sem konan var handtekin. Hún var látin sofa úr sér í fangaklefa í Keflavík en var látin laus samdægurs að lokinni skýrslutöku. Lögreglan segist hafa bent henni á hvar hún gæti nálgast hótelgistingu en annars þurfti konan að bjarga sér  eftir að henni var sleppt.

Töluverður kostnaður

TZ greinir frá því að kostnaður flugfélagsins við svona millilendingu sé mikill og ekki útilokað að konan verði rukkuð. TZ segir að hefði þessi millilending átti sér stað á München-flugvellinu þá hefði það kostað flugfélagið 8.000 evrur, eða rúmar 960 þúsund krónur miðað við gengi dagsins í dag.

RÚV spurði Isavia hvað þessi lending hér á landi kostar Lufthansa. Er kostnaðurinn í kringum 2.500 til 3.000 evrur, eða 300 til 350 þúsund krónur. Þá sé ekki útilokað að flugfélagið rukki konuna vegna eldsneytis sem þurfti við það að fljúga af leið.