Eldur kom upp í garðyrkjstöð í Hveragerði

Eldur kviknaði í garðyrkjustöð í Hveragerði skömmu fyrir miðnætti á laugardaginn. Engan sakaði og tjón liggur ekki fyrir, en ljóst er að ræktunartjón hefur orðið, samkvæmt Brunavörnum Árnessýslu. Framleiðsla á matvöru fer fram í gróðurhúsinu þar sem eldurinn kom upp.

Eldurinn var staðbundinn á ræktunarborði í gróðurhúsinu en húsið fylltist af reyk. Útlit er fyrir að eldurinn hafi kviknað út frá rafmagnsbúnaði í borðinu.

Þegar slökkviliðsmenn frá Brunavörnum Árnessýslu mættu á staðinn var lögregluþjónn, sem einnig er slökkviliðsmaður, búinn að slökkva eldinn með slökkvitæki. Húsið var svo reykræst og afhent lögreglu formlega svo hægt sé að rannsaka eldinn.