Kvörtun frá einum íbúa

Kvörtun barst frá einum íbúa vegna hundahalds Sigurbjargar Hlöðversdóttur í Hátúni 10, húsnæði Brynju, hússjóðs Öryrkjabandalags Íslands. Fréttablaðið hefur fjallað um málið að undanförnu en Sigurbjörg kærði uppsögn á leigusamningi sínum vegna hundahalds til kærunefndar húsnæðismála velferðarráðuneytisins.

Svar forsvarsmanna Brynju við kærunni hefur nú borist en þar segir að kvörtunin hafi snúið að meintum sóðaskap af hundinum og því að Sigurbjörg hafi viðurkennt að hafa brotið húsreglur með því að halda hundinn í íbúðinni.

Sigurbjörg kveðst gangast við því að hafa brotið hinar umdeildu reglur gegn dýrahaldi.

„Já, ég braut húsreglur eins og hinir dýraeigendurnir hér í Hátúni og blokk ÖBÍ að Sléttuvegi.“

Hún hafnar því að óþrifnaður sé af Hrolli, pomeranian-hundi hennar. „Við förum nær daglega á Geirsnef til að hreyfa okkur og ég þríf allt eftir minn hund þó lítið sé.“