Staðfestir dauðadóm yfir fjórum mönnum vegna hópnauðgunar og morðs

Hæstiréttur Indlands hefur staðfest dauðadóm yfir fjórum mönnum sem dæmdir voru fyrir hópnauðgun og morð á 23 ára háskólanema í Delhi árið 2012.

Dómstóll dæmdi þá Akshay Thakur, Vinay Sharma, Pawan Gupta og Mukesh Singh til dauða árið 2013. Í dómi hæstaréttar kemur fram að mennirnir hafi framið „grimmilegan glæp“ sem hafði gríðarleg áhrif á sálarlíf indversku þjóðarinnar.

Málið vakti mikinn óhug á sínum tíma, ekki bara í Indlandi heldur víða um heim, og var þess krafist að lögum um nauðganir yrði breytt.

Mennirnir réðust á konuna um borð í strætisvagni þegar hún var á leið heim úr kvikmyndahúsi í desember 2012. Hún var þar á ferð með vini sínum sem hinir dæmdu réðust einnig á.

Konan, Jyoti Singh, lést af völdum sára sinna í Singapúr þrettán dögum eftir árásina.

Í frétt BBC segir að aðstandendur konunnar hafi fagnað þegar dómari las upp dóm sinn í morgun. Talið er að það gætu tekið nokkur ár þar til að dómnum verði framfylgt.

Alls voru sex manns handteknir vegna árásarinnar á sínum tíma. Einn þeirra, Ram Singh, fyrirfór sér í fangelsi árið 2013, og öðrum, sem var sautján þegar árásin var framin, var sleppt árið 2015 eftir að hafa afplánað þrjú ár á betrunarheimili. Þrjú ár er hámarksrefsing fyrir ólögráða einstaklinga í Indlandi.