Ógreinilegri skil milli vinnu og einkalífs vegna snjalltækja

„Skil milli vinnu og einkalífs hafa orðið ógreinilegri en þau voru áður með tilkomu snjalltækja. Í stað þess að veita nauðsynlegan sveigjanleika geta snjalltækin valdið því að fólk sé í vinnunni allan sólarhringinn,“ segir Þórunn Sveinbjarnardóttir, formaður Bandalags háskólamanna.

Í tilkynningu frá BHM kemur fram bandalagið lét gera könnun meðal félagsmanna sinna um snjalltæki. Meira en helmingur svarenda sem hafa snjalltæki frá vinnuveitanda undir höndum kvaðst oft eða mjög oft fá einhvers konar skilaboð vegna vinnunnar í tækið utan hefðbundins vinnutíma.

Um fjórðungur þeirra sagðist stundum fá slík skilaboð utan hefðbundins vinnutíma en ríflega fimmtungur sjaldan eða aldrei. Rétt er að taka fram að mjög breytilegt er eftir aðildarfélögum hversu hátt hlutfall félagsmanna hefur snjalltæki til umráða frá vinnuveitanda.

Um þriðjungur hefur snjalltæki til umráða frá vinnuveitanda sínum. Fimmtungur telur að tækið hafi mikil áhrif á hvíldartíma sinn eða samskipti við fjölskyldu og vini. Þegar spurt var hversu oft fólk svaraði tölvupósti, símhringingu, skilaboðum eða öðru sem tengdist vinnu þess utan hefðbundins vinnutíma með snjalltæki sögðust um 40 prósent svarenda gera það oftar en fjórum sinnum í viku og þar af hátt í 20 prósent daglega.

Um fimmtungur þeirra svarenda sem hafa snjalltæki frá vinnuveitanda sagði að tækið hefði fremur mikil eða mjög mikil áhrif á hvíldartíma sinn eða samskipti við fjölskyldu og vini, um fjórðungur að það hefði í meðallagi mikil áhrif á þessa þætti en rúmlega helmingur sagði það hafa fremur lítil eða mjög lítil áhrif.

„Sú mynd sem birtist okkur í þessari könnun veldur nokkrum áhyggjum. Hún staðfestir það sem við töldum okkur vita,“ segir Þórunn. Könnunin var gerð af fyrirtækinu Maskínu ehf. dagana 5. maí til 28. júní sl. og náði til handhófsúrtaks úr félagaskrám aðildarfélaga BHM sem eru 27 að tölu. Svarendur voru 2.232 en samtals eru um 13.000 manns innan raða félaganna. Um 28 prósent svarenda sögðust hafa snjallsíma til umráða frá vinnuveitanda sínum, 7 prósent spjaldtölvu og hálft prósent snjallúr.