Hringurinn gefur Barnaspítalanum búnað upp á 50 milljónir króna

Kvenfélagið Hringurinn gaf Barnaspítala Hringsins búnað fyrir 50 milljónir króna í tilefni 60 ára afmælis spítalans. Þar á meðal voru 14 gjörgæsluvagnar, sex öndunarvélar og tengikvíar fyrir sprautudælur. Allar gjafirnar munu nýtast vel á vökudeild Barnaspítalans.

Hringurinn hefur verið dyggur stuðningsaðili spítalans og hefur hann styrkt starfsemina um 800 milljónir króna á 15 árum. Í frétt Landspítalans er rakin sú breyting sem orðið hefur á starfsemi Barnaspítalans á þessum 60 árum. Forseti Íslands, Guðni Th. Jóhannesson, Elísa Reed, forsetafrú og Óttarr Proppé, heilbrigðisráðherra, voru viðstödd athöfnina.