Vilja aukið gagnsæi í gjöldum hins opinbera

Félag atvinnurekenda vill að gjaldtökuheimildir sem mæla fyrir um töku svokallaðra eftirlitsgjalda verði endurskoðaðar með tilliti til sjónarmiða um skýrleika og að tillögur séu gerðar að breytingum eftir því sem tilefni gefst til.

Í nýrri skýrslu FA, sem kynnt verður í dag, kemur fram að þar sem álagning eftirlitsgjalda sé íþyngjandi fyrir atvinnulífið sé mikilvægt að regluverkið sé skýrt. Fyrir hendi séu um sextíu gjaldtökuheimildir sem mæla fyrir um töku svokallaðra eftirlitsgjalda. Einnig eru dæmi um að eftirlitsgjöldum, sem dómstólar höfðu dæmt ólögmæt, hafi verið breytt í skatta. Skýrasta dæmið sé lyfjaeftirlitsgjaldið.

„Það sem er kannski alvarlegast í þessu er að upplýsingarnar um kostnaðinn eru ekki birtar. Fyrir vikið er ekki hægt að sannreyna að gjaldtakan sé réttmæt. Þarna eru að okkar mati mjög alvarlegar gloppur í kerfinu hvað varðar gjaldtöku faggildra aðila,“ segir Ólafur Stephensen, framkvæmdastjóri FA.

„Það ættu að gilda sömu reglur um gjaldtöku eins og ef um opinbera stofnun væri að ræða, það má ekki innheimta hærri gjöld en svara kostnaði. Við tökum dæmi af Matís í skýrslunni, þar er engin opinber gjaldskrá, og því enginn rökstuðningur fyrir gjöldunum. Eftirlitsstofnanir eru einnig að senda út reikninga sem eru ósundurliðaðir,“ segir Ólafur.

Hann segir þetta klárlega þrengja að fyrirtækjum. „Sums staðar eru eftirlitsstofnanir farnar að ráða hversu oft þær koma í heimsókn og hvað þær eru að skammta sér í tekjur frá þessu eftirliti. Við viljum fá skýrari reglur sem er vörn gagnvart slíkri þróun.“